“Кыһын Саха сириттэн саҕаланар” бэстибээл чэрчитинэн Сулҕаччы нэһилиэгэр Саҥа дьыл күөх харыйатын уотун уматтылар, “Хаарчаана Куо — 2024” диэн бэртээхэй күрэх тэрийдилэр.
Манна “Бэйэни билиһиннэрии”, “Эгэлгэ талаан”, “Кыһыҥҥы фантазия” уонна үгэс быһыытынан Хаарчаана көстүүмнээх дефиле — сыанаҕа хаамыы түһүмэхтэринэн барыта 12 кэрэчээн кыргыттар кыттыыны ыллылар. И.И. Константинов-Дэлэгээт Уйбаан аатынан Сулҕаччы орто оскуолатын алын кылааһын үөрэнээччилэрин сэргэ, “Чычып-чаап” уһуйаан иитиллээччилэрэ кэлэн бэйэлэрин билиһиннэрэн, ону сэргэ ыллаан-үҥкүүлээн, хоһоон ааҕан, араас матырыйааллартан көрүөхтэн кэрэ харыйа оонньуурдарын оҥорон аҕалан дьүүллүүр сүбэ да, көрөөччүлэр да болҕомтолорун, сөҕүүлэрин, билиниилэрин ыллылар.
Кыттааччылар бары анал аат уонна сыаналаах бириис ылан, үөрэн-көтөн тарҕастылар. Ол курдук : “Мичийээнэ Куо” – Борисова Милена, “Кэрэчээнэ Куо” – Баишева Анита, “Нарыйаана Куо” – Иннокентьева Алисия, “Сандаара Куо” – Алексеева Диана, “Сатабыл Куо”- Андросова Альмира, “Сулусчаана Куо”- Сазонова Айыллаана, “Кыырпах Куо”- Иннокентьева Эльза, “Кэскиллээнэ Куо” — Степанова Сайнаара, “Кэрэхсэбил Куо” — Фелегонова Тома, “Туйгууна Куо” — Неустроева Карина, “Талаана Куо” – Сазонова Айсена буоллулар. Онтон “Хаарчаана Куо-2024” — муҥутуур кыайыылаах анал ааты 3 кылаас үөрэнээччитэ Настя Степанова ылла.
Дьүүллүүр сүбэ бэрэссэдээтэлинэн РФ уопсай үөрэхтээһинин бочуоттаах үлэһитэ, ветеран-педагог Саргылана Николаевна Рязанская үлэлээтэ.
Елена Попова.