Бүгүн, олунньу 8 күнүгэр Аммабыт дьиҥ патриота, сырдык, ыраас дууһалаах салайааччы, Амма улууһун социальнай эйгэтин 15 сылтан ордук кэм устата дьоһуннаахтык салайан кэлбит, улуус бочуоттаах олохтооҕо, СӨ норуотун хаһаайыстыбатын үтүөлээх үлэһитэ Прасковья Емельянова күн сирин көрбүтэ. Тапталлаах салайааччыларын, биир дойдулаахтарын ытыктаан бу күн бөтүҥнэр „Талааннаах салайааччы, уопсастыбаннай диэйэтэл Прасковья Ивановна Емельянованы ахтан-санаан…“ диэн төгүрүк остуол тэрийэн ыыттылар. Бу күн сарсыардаттан С.Е. Николаева аатынан Ийэ искибиэригэр Прасковья Ивановнаҕа анаммыт ыскамыайкаҕа сибэкки дьөрбөтүн уурдулар, таһаартарбыт кинигэлэрин быыстапката турда, истиҥ иһирэх ахтыы буолан ааста.
Амма улууһун салайааччыларын кэккэлэригэр биир инники күөҥҥэ турар, өрөспүүбүлүкэҕэ бэйэтин аатын-суолун хаалларбыт Прасковья Емельянова бүгүн баара буоллар баара эрэ 61 сааһын томточчу туолуо этэ. Ону баара ыарыы ыыппакка ыксары тутан хаарыан талааннаах салайааччыны илдьэ барбыта кыһыытын… Ити эрээри ыыппыт үлэтэ, үлэҕэ сыһыана, дьоҥҥо үтүө өйдөбүлэ кинини куруутун ааттата, саната туруохтара. Прасковья Ивановна күн сирин көрбүт күнэ Бөтүҥ нэһилиэгэр баар С.Е. Николаева аатынан Ийэ искибиэригэр баар Прасковья Емельянова аатынан ыскамыайкаҕа сибэкки дьөрбөтүн уурууттан саҕаланна. Манна кыттыыны улуус баһылыга Степан Кузьмин, улуус дьокутааттарын Сэбиэтин бэрэссэдээтэлэ Владимир Колосов, Бөтүҥ нэһилиэгин баһылыга Алексей Никитин, Прасковья Ивановна чугас дьоно, дьүөгэлэрэ ыллылар.
„Прасковья Ивановна биһиги наставникпыт буолар. Кини эдэр салайааччылары бэйэтин хонноҕун анныгар ылан куруутун сүбэлии-амалыы сылдьара. Кини Амматын олус күүскэ таптыыра уонна кини сайдарыгар хорсуннук, бэйэтин биэрэн туран үлэлээбитэ биһиэхэ холобур буолар. Биһиги хаһан да кини аатын умнуохпут суоҕа, дойдутун туһугар киллэрбит кылаатын махтана саныы сылдьыахпыт. Талааннаах салайааччыбытын үйэтитэр сыаллаах быйыл ыам ыйыгар Амма нэһилиэгин хабыллар ортотугар кини аатынан искибиэри тутан үлэҕэ киллэриэхпит“, — диэн улуус баһылыга Степан Кузьмин сибэкки дьөрбөтүн ууруу сиэригэр санаатын тириэртэ.
Бу кэнниттэн С.Я. Левин аатынан норуот айымньытын култууратын дьиэтигэр Прасковья Ивановна туһунан истиҥ иһирэх ахтыы „төгүрүк остуола“ ыытылынна. Кэпсэтиини СӨ үтүөлээх учуутала Светлана Неустроева салайан ыытта. Кини Прасковья Емельянова олоҕун суолун билиһиннэрэн, кини туһунан алтыспыт дьон ахтыытыттан иһитиннэрэ-иһитиннэрэ биир биир кэлбит дьоҥҥо санааларын этэллэригэр тыл биэрэн истэ. Ол курдук ис дууһаларыттан махтал тыллардаах, сөҕөр-махтайар этиилэрдээх санааларын улуус дьокутааттарын Сэбиэтин бэрэссэдээтэлэ Владимир Колосов, Бөтүҥ нэһилиэгин баһылыга Алексей Никитин, чугас дьүөгэлэрэ, бииргэ алтыһан өр кэмҥэ бииргэ үлэлээбит, Дьокуускайдааҕы оҕо сэллиги эмтиир балыыһатын кылаабынай бырааһа Софья Александрова, А.А. Черемных аатынан оҕо ускуустубатын оскуолатын дириэктэрэ Любовь Заварзина, „Арассыыйа ийэлэрэ“ уопсастыбаннай хамсааһын Амма улууһугар салаатын салайааччыта Оксана Архипова, Амматааҕы кииннэммит бибилэтиэкэ сүрүн бибилэтиэкэрэ Вероника Стручкова, Дьокуускайдааҕы тыа хаһаайыстыбатын техникумун рабочай кадрдары бэлэмниир Амма улууһугар филиалын салайааччыта Марфа Дмитриева, Амма улууһун социальнай уонна эдэр ыччат бэлиитикэтин салалтатын салайааччыта Саргылана Неустроева, дьиэ кэргэн отделын социальнай педагога Марфа Ким Ир Сен, анал байыаннай дьайыы кыттыылаахтарын кытта үлэлэһэр салаа исписэлииһэ Саргылана Константинова, бииргэ үөрэммит үөлээннээҕэ Маргарита Кутукова, Бөтүҥ орто оскуолатын дириэктэрэ Акулина Иванова, Бөтүҥ нэһилиэгин дьаһалтатын исписэлииһэ Тамара Давыдова, Прасковья Ивановна чугас дьоно, кыргыттара Саргылана Хван, Александра Жиркова, балта Ирина Олесова тириэртилэр. Кинилэр ис сүрэхтэриттэн долгуйан туран, талааннаах салайааччы, истиҥ дьүөгэ, амарах ийэ, эбээ, тапталлаах кэргэн, дьоһун хаһаайка туһунан, кинини кытта алтыспыт кэмнэрин ахтан-санаан аастылар. Марфа Егоровна „Уран саха“ ювелирнай хампаанньа бэйэтин үбүлүөйдээх кинигэтигэр Прасковья Ивановнаны истиҥник санаан киллэрбитин кэпсээн туран, ол кинигэни улуустааҕы киин бибилэтиэкэҕэ уонна Бөтүҥ нэһилиэгин бибилэтиэкэтигэр бэлэх быһыытынан туттарда.
„Наһаа үчүгэй кэпсэтии буолла. Талааннаах салайааччыны ытыгылаан кинини истиҥник саныыр дьүөгэлэрэ, алтыспыт дьоно кэлбититтэн үөрдүбүт уонна махтанабыт. Ол гынан баран бу тэрээһин буоларын туһунан биллэрии барбыта да, нэһилиэк баһылыгын солбуйааччылара кэлбэтэхтэриттэн олус хомойдум. Манна кинилэр кэлэн кыттыбыттара, дьон санаатын истэн, бэйэлэрэ эмиэ этэн барбыттара буоллар элбэҕи туһаныа этилэр“, — диэн этэр Бөтүҥ нэһилиэгин дьаһалтатын исписэлииһэ Тамара Давыдова.
Кырдьыга да, 15 сылтан ордук кэмҥэ социальнай эйгэни салайбыт киһи олоҕун кытта билсии, кини туһунан дьон санаатын истии – бу билигин үлэлии сылдьар баһылык солбуйааччыларыгар улахан көмө буолуо этэ. Кини олорбут олоҕо – бу бэйэтэ холобур буолар олох . Ыытыллыбыт „төгүрүк остуол“ түмүгүнэн Амма патриота, кини сайдарыгар туох бары сатабылын биэрэн туран үлэлээбит, үгүс эдэр дьоҥҥо холобур буолар олоҕу олорбут Прасковья Емельянова аатын үйэтитэр инниттэн сыллата кини төрөөбүт күнүгэр тэрээһиннэри ыытарга, онно ананан эрдэ ыытыллыбыт оскуола оҕолорун ортолоругар лидер кыргыттар күрэхтэрин салгыырга, ону таһынан нэһилиэк баһылыгын солбуйааччыларын ортолоругар эмиэ ыытарга диэн этиилэр киирдилэр, ол этиилэринэн резолюция ылыллан инники үлэҕэ олук буолуоҕа. Тэрээһин кыттыылаахтара Бөтүҥ нэһилиэгин „Күн Куо“ уонна „Күбэй“ ансамбыллар ылбаҕай ырыаларын астына, дуоһуйа иһиттилэр.
„Амма олоҕо“ хаһыат