Сүрэҕи сылытар хаар оҥоһуктар

Бөтүҥ нэһилиэгин олохтооҕо Дмитрий Татаринов сыл ахсын тэлгэһэтин араас дьэрэкээн хаар оҥоһуктарынан киэргэтэр. Онон кинилэр тэлгэһэлэригэр өрүү оҕотуттан аҕам саастаахтарга тиийэ элбэх ыалдьыттардаах буолаллар. Олохтоохтор биир дойдулаахтарын саҥаттан саҥа айымньыларын кэлэн көрөн,  сөҕөн-махтайан бараллар.

Саха сиригэр элбэх киһи хаартан, муустан оҥоһуктары сыл ис хоһоонунан  кэҥэтэн, дириҥэтэн оҥорор буоллулар. Хас биирдии нэһилиэккэ бу маннык оҥоһуктары үлүһүйэн оҥорор энтузиаст дьоннор бааллара олус кэрэхсэбиллээх. Бөтүҥ нэһилиэгэр хаар оҥоһуктарынан сылын аайы оҕолорун үөрдэр биир оннук киһибит — Дмитрий Моисеевич Татаринов буолар. Кини быйыл эмиэ хаар оҥоһуктарынан тиэргэнин киэргэттэ. Дьэрэкээн оҥоһуктары сэргээн аҕам саастаах эдьиийдэр, “Талаана” түмсүү кыттыылаахтара ыалдьыттаатылар.

Талааналар хас биирдии оҥоһукка оҕо саастарын санатар, сүрэҕи үөрдэр иэйиигэ куустаран, хаартыскаҕа түһэн, оҕолуу үөрэн-көтөн, сэмэй бэлэхтэрин туттаран, махтанан,”бу курдук дьэрэкээн оҥоһуктары сыллата оҥорон оҕону-урууну, дьону-сэргэни үөрдэ туруҥ,  дьоллоох-соргулаах буолуҥ ” диэн алҕаан бардылар.  Аҕыс оҕолоох Анна Павловна уонна Дмитрий Моисеевич Татариновтар бу курдук кэрэни, кэрэхсэбиллээҕи тарҕата, дьону үөрдэ, айа-тута, оҥоро турдуннар.

Вера Жиркова-Тускууна.

Читайте дальше