Амма сүүрүүк оҕолоро ааспыт нэдиэлэни быһа дьоллоох Дьокуускайтан ордубатылар. Икки улахан түһүлгэҕэ күүстэрин холонон, киһи мыыммат кыайыытын ындыыланан, ситиһиитин сэтиилэнэн эргилиннилэр.
Тохсунньу 18-19 күннэригэр доруобуйаларынан хааччахтаах оҕолор ортолоругар өрөспүүбүлүкэҕэ бастыыр иһин күрэх ыытыллыбыта. Манна Амматааҕы оҕо спортивнай оскуолатын сүүрүүгэ тириэньэрэ Ксенофонт Федоров бэлэмнээбит оҕолоро кылбар кыайыылары ыллылар. 60 уонна 200 миэтэрэҕэ Максим Птицын чөмпүйүөннээтэ. Саша Левин 60 миэтэрэҕэ иккис миэстэҕэ тиксэн баран 200 миэтэрэҕэ бастаата. Инньэ гынан оҕолор уопсай түмүккэ, Дьокуускай күүстээх хамаандатыгар эрэ баһыйтаран, иккис бочуоттаах миэстэҕэ тигистилэр. Аны, бу ыытыллыбыт түһүлгэ “Спортивные якутяне” спартакиада сочуотугар ааҕыллар. Онон, Дьокуускай куорат киин бөлөххө баарынан, Амма хамаандата бэйэтин бөлөҕөр бастакы миэстэ буолан таҕыста.
Иккис улахан күрэх – тохсунньу 20-21 күннэригэр чэпчэки атлетикаҕа 2007-2010 сыллаах төрүөх оҕолор ортолоругар өрөспүүбүлүкэ турнира буолла. Манна 24 хамаанда, барыта холбоон, 295 спортсмен кытынна. Амматааҕы оҕо спортивнай оскуолатын тириэньэрдэрэ Марианна Нестерова, Игорь Николаев, Ксенофонт Федоров коррекционнай оскуола тириэньэрэ Екатерина Сивцева, физкультура учуутала Александр Илларионов уонна Эмистэн физкультура учуутала Мария Неустроева 15 оҕону арыаллаан тиийэн куоталастылар.
Күрэх бастакы күнүгэр 1500 миэтэрэҕэ Люба Николаева иккис, Максим Николаев эмиэ иккис миэстэ буолбуттара. Иккис күҥҥэ оҕолор табыллан сүүрдүлэр. Ол курдук, 3000 миэтэрэҕэ Люба Николаева бастакы уонна Иван Никитин үһүс миэстэни ыллылар. Максим Николаев 800 миэтэрэҕэ эмиэ бастакынан кэллэ. Сайаан Левин ядрону быраҕыыга иккис миэстэҕэ тигистэ.
Онтон 2007-2008 сыллаах төрүөх оҕолор икки ардыларыгар ыытыллыбыт эстафетаҕа Амма хамаандата үһүс миэстэни ыллылар. Хамаандаҕа Максим Николаев, Эрчим Васильев, Дамир Протопопов, Максим Птицын сүүрдүлэр.
Ксенофонт Григорьевичтан тириэньэр киһи хараҕынан оҕолор кыттыыларын хайдах сыаналаан олорорун, спортсменнар салгыы ханнык түһүлгэҕэ күүстэрин холоһуохтарын туһунан токкоолостубут.
Ксенофонт Федоров: “Оҕолорбут күрэххэ үчүгэйдик кытыннылар дии саныыбыт. Максим Птицын иккис разряды толордо. Кэлэр ыйга Арассыыйа түһүлгэтин айааһаан көрүөҕэ. Онтон Максим Николаев, Иван Никитин сайын оскуола оҕолорун спартакиадатыгар кыттыахтара. Люба Николаева эрдэ спартакиадаҕа 3000 миэтэрэҕэ эмиэ бастаабыта. Онтон ыалдьан хас да күрэхтэһиини көтүтэн турар. Уһуннук тохтуу сылдьан баран дьарыктанан, 3000 миэтэрэни эмиэ ылан өрөспүүбүлүкэҕэ лидер буолла. Соругун ситтэ. Любабыт “Азия оҕолоро” оонньууга хайа баҕарар кыттар кыахтаах, резервэҕэ сылдьар спортсмен. Кыыспыт сүүмэрдэнэн өрөспүүбүлүкэ хамаандатыгар хапсан да хааллаҕына көҥүлэ. Ол эрэн күөһү эрдэ өрүнэр табыллыбат, көстөн иһиэҕэ. Быйылгы Азияҕа 2009-2010 сыллаах төрүөх оҕолор кытталлар. Азия оҕолоругар кимнээх күрэхтэһэллэрин өрөспүүбүлүкэ старшай тириэньэрдэрэ быһаараллар. Амматтан манна саастарынан хапсар үчүгэй сүүрүүк оҕолор элбэхтэр. Олору салгыы чочуйан үлэлэһэбит, сүүрэбит-көтөбүт эрэ”.
Олег Егоров.