Болугурга төрөөбүт тыл уонна сурук-бичик күнүн «Колосок» уһуйааны кытта бииргэ үөрүүлээхтик бэлиэтээтибит. Уһуйаан уонна олохтоох бибилэтиэкэ бииргэ «Кинигэ — бастыҥ доҕор» диэн бырайыагынан үлэлиибит.
Остуоруйаттан оҕо элбэх үтүө өрүттэргэ үөрэнэр, төрөөбүт дойдутун историятын интэриэһиргиир буолар. Манан сиэттэрэн оҕолорго «Таал-Таал эмээхсин» саха норуотун остуоруйатынан аралдьытыы ыыттыбыт. Биһиэхэ күүс-көмө буолан бибилэтиэкэбит ааҕааччылара, уһуйаан төрөппүттэрэ көхтөөхтүк кытыннылар. Саха тылын күнүн туһунан иһитиннэрии кэнниттэн кырачааннар остуоруйа эйгэтигэр киирдилэр. Таал-Таал эмээхсин оруолун бибилэтиэкэбит бастыҥ доҕоро Зоя Аммосова итэҕэтиилээхтик оонньоон оҕолору үөртэ-көтүттэ. Муус-муус оруолугар бибилэтиэкэр, төрөппүт Наталья Софронова, Күн-күн оруолугар төрөппүт Сардаана Филиппова, Былыт-былыт оруолугар төрөппүт Лидия Семёнова, Тыал-тыал оруолугар төрөппүт, уһуйаан үлэһитэ Аграфена Кисинянова, Хайа-хайа оруолугар эһээ Владимир Тимофеев, Киһи-киһи оруолугар убай Дьулуур Федотов олус үчүгэйдик, табыллан оонньоотулар, кырачаан көрөөччүлэр дохсун ытыстарын тыаһын бэлэхтээтилэр.
Хас биирдии остуоруйа дьоруойа оҕолорго сахалыы оонньуулары оонньотто, саха тыла баай байҕалыгар киллэрдэ. Түмүккэ киһи күүстээх санаалааҕа, муударайа, кыайыгаһа- хотугаһа көһүннэ, Таал-Таал эмээхсини быыһаан, үөрэн-көтөн аралдьытыыбытын уопсай оһуор үҥкүүтүнэн түмүктээтибит. Көхтөөх кыттыыны ылбыт күндү дьоммутугар, уһуйаан үлэһиттэригэр, кырачаан көрөөччүлэрбитигэр барҕа махталбытын тиэрдэбит. Саха остуоруйатын оҕолорбутугар кэпсиэҕиҥ, ааҕыаҕыҥ, саха фольклорун баай кистэлэҥнэригэр уһуйуоҕуҥ.
Марианна ЕГОРОВА.