Дьокуускай куоракка иккис төгүлүн “Цифровой алмаз” диэн федеральнай таһымнаах форум сэтинньи 23-24 күннэригэр ыытыллар. Форуму Ил Дархан Айсен Николаев аста уонна цифровой экономика лидердэрин түмпүт улахан тэрээһин бары кыттыылаахтарыгар ситиһиилэри баҕарда. Кини маннык тэрээһиҥҥэ Арассыыйа технологическай сайдыытыгар туһуламмыт кэпсэтиилэр ыытылаллара олус суолталааҕын эттэ. Биллэрин курдук форумҥа 2,5 тыһыынча киһи кыттыыны ылар. Бастакы күн араас хампаанньалар бэйэлэрин бородууксуйаларын көрдөрөр быыстапкалара үгүс дьон болҕомтотун тарта.
Форум Уһук Илиҥҥэ саамай улахан “Үлэ кыбаартала” креативнай кластерга буола турар. Манна араас интэриэһинэй былаһааккалар үлэлииллэр, быыстапкалар турбуттар. Холобура оннук биир интэриэһинэй быыстапканы Татарстан өрөспүүбүлүкэтин Казань куоратыттан кэлэ сылдьар “АйСиЭл Техно” ХЭТ аҕалбыт. Бу тэрилтэ киин сиртэн тэйиччи сытар нэһилиэктэргэ, медицинэ тэрилтэтэ суох сиригэр, эбэтэр суһал көмөнү түргэнник оҥорууга анаммыт эмчит чымадааннарын билиһиннэрэ аҕалбыт.
“Бу чымадаан иһигэр ыалдьыбыт киһи температуратын, холестеринын, саахарын, хаанын баттааһынын, сүрэҕин бэрэбиэркэлиэххэ сөп эбит. Өссө интернет баар сиригэр манна угулла сылдьар компьютерынан киин сиргэ тахсан түргэнник консультацияны ылыахха сөп. Онтон сибээс суох түгэнигэр ыарыһах туһунан информацияны компьютерга уган баран, интернет баар сиригэр кэлэн ону тута быраастарга сибээс нөҥүө тиэрдиэххэ сөп. Бу саамай дьоҕус чымадаан. Маны таһынан биһиэхэ араас анализтары, бэл рентген кытта оҥорор улахан медицинскэй чымадааннар бааллар. Ону ханна баҕарар тиийэн остуол курдук кэҥэтэн тардан кэбиһиэххэ сөп. Биһиги таһаарар чымадааннарбыт көмөлөрүнэн ФАП-тар игин суох сирдэригэр тиийэн диспансеризация, медицинскэй көрүүнү ыытыахха сөп ”, — диэн тэрилтэ бэрэстэбиитэлэ Александр Александров билиһиннэрэр. Хаартыскаҕа:»АйСиЭл Техно» ХЭТ партнера «ВИ ИНТЕГРАЦИЯ» ХЭТ бырайыактар менеджердэрэ Андрей Анисимов
Александр эппитинэн кинилэр тэрилтэлэрэ компьютердары, моноблоктары, сервистэри оҥоруунан дьарыктанар эбит. Ону таһынан бу маннык эмп тэрилтэлэригэр аналлаах медицинскэй чымадааннары айан таһаарбыт. Эппитим курдук манна баар кыра ноутбуктарга ыарыһах туһунан информацияны киллэрэн, салгыы эмтэниини барарыгар, диагноз туруорарга көмөлөөх. Онон чахчы да олус наадалаах чымадаан эбит диэн көрдүм. Биһиги ыраас сытар нэһилиэктэрбитигэр, эбэтэр суһал көмө сулууспаларбытыгар маннык чымадааннар олох туһалаах, ыарыһаҕы суһаллык көрүүгэ наһаа туһалаах буолуо эбиттэр.
Өссө биир биһиэхэ тыа дьонугар наадалаах тэриллэри бэйэбит өрөспүүбүлүкэбитигэр баар “Безопасная Арктика” ХЭТ көрдөрүүгэ туруорбут. Холобура манна сүппүт дьону көрдүүргэ, эбэтэр муммут киһи тыаҕа сылдьан туһанарыгар аналлаах тэриллэр бааллар. Тэрилтэ бэрэстэбиитэлэ Юрий Жирков улуустарга баар ЕДСС сулууспаларыгар аналлаах көрдүүр, сигнал ылар оборудованиены кэпсээтэ. Бу оборудование көмөтүнэн сибээс хаппат сиригэр 300-400 км -тэн хайа баҕарар ЕДСС-һы кытта сибээстэһиэххэ сөп. Маннык рациялары биһиги сылгыһыттарбыт базаларыгар туруохтарын сөп эбит диэн көрдүм. Оччотугар туох эмит суһал наада буоллаҕына, бу рациянан көмө көрдүөххүн сөп.
“Амма олоҕо” хаһыат.