Амматааҕы В.Г. Короленко аатынан 1№ нүөмэрдээх орто оскуолаҕа төрөппүт кэмпириэнсийэтэ иккис төгүлүн ыытыллынна. Кэмпириэнсийэ норуот педагогикатыгар ананна. Сүрүн сыалынан төрөппүт оҕону кытта сибээһин бөҕөргөтүү, норуот педагогикатын өйдөбүлүн, суолтатын үрдэтии, иитии боппуруостарыгар билиини хаҥатыы буолар.
Норуот педагогикатыгар анаммыт кэмпириэнсийэҕэ төрөппүттэр олус интэриэһинэй тиэмэлэри кэпсээтилэр уонна ырыттылар. Ол курдук, «Айыы сиэрин — айылҕаны харыстааһын» секцияҕа Саргылана Жиркова — «Простые эко-привычки», «Ааҕыан — үгүһү билиэҥ” секцияҕа Туяра Никифорова — «Дорога к чтению», «Чөл олох — ыраас санаа, чэгиэн турук» секцияҕа Айыына Флегонтова — «Күүһү сэниэни биэрэр утахтар», «Дьиэ кэргэн экономиката — туруктаах буолуу» секцияҕа Петр Табунанов — «Бииртэн биэс, биэстэн уон» уонна Наталья Кобельянова «Дьиэ кэргэн экономиката — туруктаах буолуу» диэн тиэмэлэргэ интириэһинэй дакылааттары иһитиннэрдилэр.
Конференция түмүгүнэн эспиэрдэр төрөппүттэргэ бу суруллубут дакылааттарын өссө кэҥэтэн, дириҥэтэн, бырайыак быһыытынан олоххо киллэрэллэрин сүбэлээтилэр. Түмүккэ 1-кы миэстэни Айыына Флегонтова уонна Наталья Кобельянова, 2-с миэстэни Туяра Никифорова, 3-с миэстэни Петр Табунанов уонна 4-с миэстэни Саргылана Жиркова ыллылар.
Кыайыылаахтар Добун суругунан наҕараадаланнылар. Эспиэрдээбит уонна үтүө сүбэһиттэринэн оскуолабыт мецената, педагогическай үлэ бэтэрээнэ, «Книжный маркет» хаһаайката Анна Спиридоновна Брызгаева, оскуолабыт мецената, педагогическай үлэ бэтэрээнэ Лариса Васильевна Дьяконова, В.М. Новиков -Күннүк Уурастыырап аатынан Амматааҕы киин бибилэтиэкэ идэлээх үлэһитэ Алена Анатольевна Семенова буоллулар. Биһиги кинилэргэ дириҥ махталбытын тириэрдэбит.
Мария СЛЕПЦОВА, оскуола социальнай педагога