Аллараа Бэстээх киинигэр биир дойдулаахпыт, СӨ норуотун хаһаайыстыбатын үтүөлээх үлэһитэ, урбаанньыт, меценат Руслан Федотов тиэхиньикэлээх дьоҥҥо анаан аныгы матырыйаалынан тутуллубут саҥа маҕаһыыннарын бар дьонун кытта үөрүүлээхтик арыйда. Бу күн өссө Саҥа дьыл бэлиэтэ күөх харыйа дьиримнии умайда. Дьоро тэрээһини улуус култуураҕа уонна норуот айымньытыгар салалтатын исписэлиистэрэ тэрийэн ыыттылар.
Бар дьонугар ытыктабылынан туһанар, икки улуус, хас да нэһилиэк бочуоттаах олохтооҕо Руслан Федотов бэлиэ күнэ сахалыы алгыһынан саҕаланна. Сиэр-туом толоруллан, аал уот оттуллунна. Саҥа тутуу арыллыбыт бэлиэтин, аалай лиэнтэни хаһаайын Руслан Федотов, Амма улууһун баһылыга Степан Кузьмин уонна Мэҥэ Хаҥалас улууһун дьокутааттарын Сэбиэтин бэрэссэдээтэлэ Иннокентий Андросов быстылар.
«Сахабыт сиригэр кэнники сылга омук улахан техникалара кэллилэр. Аны аҕыйах сылынан Өлүөнэ өрүһү туоруур муоста тутуллан үлэҕэ киириэ, эмиэ техника кэлэн үлэлиэ. Онно бэлэмнэнии үлэҕэ бастакы хардыыбыт курдук буолар. Биһиги атыы-эргиэн эйгэтигэр үлэлээбиппит 26 сыл буолла. Бу сыллар усталарыгар Арассыыйа элбэх собуоттарын кытта ыкса ситимнээхтик үлэлээн кэллибит уонна инникитин үлэлиэхпит да турдаҕа. Маҕаһыыннарга кэлэн атыыланыахтаах техника аҥара тиэллэн кэлбитэ. Аҥара Саҥа дьыл кэнниттэн кэлиэхтээх. Маҕаһыын үлэһиттэринэн толору хааччыллыылаах. Саҥа арыллыбыт маҕаһыын сүрүннээн ыарахан уйуктаах техникаларга, спецтехникаларга саппаас чаастары атыылыа. Биһиги стратегическай партнербутунан Белоруссия өрөспүүбүлүкэтэ буолар. Мантан МТЗ тыраахтыр, саппаас чаастары аҕалабыт. Мин биир дойдулаахтарбар үүнэр сылга бары үтүөнү баҕарабын. Өҥ дьыл кэллин, тыа баһаардара тахсыбатыннар»-диэн Руслан Еремеевич санаатын үллэһиннэ.
Күн бүгүн Руслан Еремеевич салайар маҕаһыыннарын ситимигэр бастайааннай төрүккэ 100-чэкэ киһи үлэлиир. Сайын бу ахсаан 150-чаҕа тиийэр. Дьоро күн тэрилтэ бастыҥ үлэһиттэрэ Бырабыыталыстыба үрдүк наҕараадаларын туттулар. Ол курдук, Ил Дархан Грамотатынан Ирина Слепцова, Ил Түмэн сис кэмитиэтин Бочуотунай грамотатынан Татьяна Устинова, Анастас Игнатьев, «СӨ тыатын хаһаайыстыбатын туйгуна » бэлиэнэн Николай Кондаков, министиэристибэ Махтал суругунан Алексей Михалев, Раиса Григорьева, СӨ предпринимательствоҕа, эргиэҥҥэ уонна туризмҥа министиэристибэ Грамотатынан Рафаэль Соколов, Евгения Петрова, Егор Николаев, «Амма улууһун киэн туттуута» бэлиэнэн Аграфена Николаева, Амма улууһун дьаһалтатын Бочуотунай грамотатынан Аммос Макаров, Мэҥэ Хаҥалас улууһун Махталынан Анастасия Теплых, Арсен Николаев наҕараадаланнылар.
Бу күн салайааччы Руслан Федотовка истиҥ махтал тыллара ис сүрэхтэн этилиннилэр. Аммалар маннык бар дьон махталын ылар, үгүс дьоҥҥо күүс-көмө буола олорор биир дойдулаахтарынан киэн тутуннулар. Онон киниэхэ Аллараа Бэстээх куорат тииптээх нэһилиэк Бочуоттаах олохтооҕун аата иҥэриллибитин дохсун ытыс тыаһынан көрүстүлэр.
«Биһиги убайбытынан, тумус туттар киһибитинэн киэн туттабыт. Чахчы маннык тыа сиригэр техникаҕа аналлаах маҕаһыын аһыллара олус наадалаах. Биһиги сахалар былыр былыргыттан сайынтан кыһыҥҥа диэри олоробут. Онон сир-уот үлэтэ хаһан да бүппэт. Урут илин эҥэр олохтоохторо саппаас чаас көрдөөннөр Дьокуускай куоракка киирэллэрэ. Билигин ханна да туораабакка, хаайтарбакка, Руслан Еремеевич маҕаһыыннарыгар кэлиэхтэрин сөп. Аны билигин кыра эрэ техника буолбакка, өссө «Ситра», «Хово» курдук улахан техникаларга эмиэ саппаас чаастары ылыахха сөп. Маҕаһыыннары көрдүм, туох да үчүгэй. Онон өрөспүүбүлүкэ олохтоохторо, техникалаах дьон манна кэлэн наадыйар чаастаргытын атыылаһыҥ диэн ыҥырабын«,- диэн Нөмүгү килиэп собуотун ситимин салайааччыта Вячеслав Нестерев санаатын үллэстэр.
Саҥа маҕаһыын аһыллыбыт үөрүүлээх күнүнэн эҕэрдэ тылларын Ил Түмэн тутууга, дьиэ-уот коммунальнай хаһаайыстыбатыгар уонна энергетикаҕа сис кэмитиэтин бэрэссэдээтэлэ Александр Корякин, Амма улууһун баһылыга Степан Кузьмин, Амма улууһун тыатын хаһаайыстыбатын управлениетын салайааччыта Ион Кононов, Чурапчы улууһун баһылыга Степан Саргыдаев, Мэҥэ Хаҥалас улууһун дьокутааттарын Сэбиэтин бэрэссэдээтэлэ Иннокентий Андросов, «Аллараа Бэстээх бөһүөлэгэ » куорат поселениетын баһылыгын солбуйааччы Ирина Егорова уонна да атын үгүс элбэх тэрилтэлэр, махталлаах дьон тириэртилэр.
«Амма олоҕо» хаһыат.