Тимир ууһун маастара хомус охсууга маастар -кылаас ыытта

Аммаҕа Олоҥхо ыһыаҕар бэлэмнэнэн араас суол тэрээһиннэр быыстала суох бараллар. Чапчылҕан нэһилиэгэр Ф.Лобанов аатынан орто оскуола Ууһун кыһатыгар СӨ норуотун маастара, Ил Дархан быйылгы стипендиата, СӨ «Удьуор Уус»,»Амма улууһун уран ууһа» бэлиэлэрдээх ,СӨ култууратын туйгуна, Сатаҕай нэһилиэгин бочуоттаах олохтооҕо Алексей  Скрябин тимиртэн саха хомуһун охсууга  тимир  уустарыгар маастар кылаас ыытта.


Манна барыта 9 уус уонна Чапчылҕан (сал.Артемьев И.В), Амма 2№-дээх (сал.Портнягин С.П.) орто оскуолаларыттан  7 үөрэнээччи  бэркэ сэҥээрэн  кыттыыны ыллылар. Көрсүһүүгэ  Алексей Скрябин  2011 с. хомуска бастакы маастар- кылааһыгар оҥорбут хомуһун  Михаил Михайлов — Удьурхай Мэхээлэ уура сылдьарын көрдөрөн барыбытын соһутта. Быйылгы маастар — кылааска оҥоһуллар хомус 3 чаас устата чочуллан, оҥоһуллан бэлэм буолла. Алексей Петрович  саҥа охсубут хомуһугар оонньоон иһитиннэрдэ. Онтон ким сатаан хомуһу тардааччы боруобалаан көрдүлэр.  Күүтүүлээх оҥоһук табыллыбытын тутан-хабан, оонньоон көрөн баран, маастарга махталларын биллэрэн ытыс таһыныытынан эҕэрдэлээтилэр. Оскуола оҕолоро, ордук Вася Слепцов, Женя Чириков олус интириэһиргээн норуот маастарын хас хамсаныытын,туттарын — хаптарын, хайдах таптайарын-чочуйарын болҕойон олорон көрдүлэр-иһиттилэр.

 

Түмүккэ норуот маастарыгар Алексей Скрябин бүгүҥҥү ыыппыт үлэтигэр улуус тимиргэ маастардара улаханнык махтаннылар уонна салгыы кулун тутар  24 күнүгэр Сатаҕайга ыытыллар норуот маастара, өрөспүүбүлүкэ тимир уустарын уопсастыбаннай түмсүүтүн салайааччыта  Александр Терентьев — Айгын Уус уһанар дьиэтин миэстэтигэр Уһаарыыга кэлэн көхтөөх  кыттыыны ыларга ыҥырдылар. Маастар-кылаастан кыттыбыт дьон бары үөрэн-көтөн дуоһуйан тарҕастылар.

Ольга СУДИНОВА

Читайте дальше