Аҕам саастаах дьоҥҥо көмөлөһүү үтүө үгэһэ билигин да баар. Амма улууһун оскуолаларыгар оҕолор «тимуровскай» хамсааһыҥҥа көхтөөхтүк кытталлар, махталы ылаллар.
«Сааһырдахха уонна соҕотох буоллахха тэлгэһэ иһинээҕи үлэ дэбигис кыайтарбата биллэр. Онуоха күһүн-саас миэхэ өйөбүл, өрүһүлтэ буола үүнэр ыччат тиийэн кэлэн, көдьүүстээх көмөнү оҥороро киһини үөрдэр. Тимуровецтар кыыдааннаах кыһын оһоххо оттуллар маһы хайытан, сааһылаан бэлэмнииллэр уонна дьиэ тула хаары анньан биэрэллэр. Билиҥҥи кэмҥэ оҕо дьиэ таһынааҕы үлэ диэнтэн тэйэн иһэрэ биллэр. Ол эрээри түгэн түбэстэр, сүргэтэ көтөҕүллэн кэлэр эбит диэн санаалаахпын. Көхтөрө көтөҕүллэ, күүстэрэ күүрэ түһэргэ дылы! Ол курдук олунньу 5 күнүгэр үөрэхтэрин кэнниттэн Амма 2-с нүөмэрдээх оскуола «Молот» диэн анал байыаннай дьайыы кыттыылааҕа Владимир Мелентьев аатын сүгэр байыаннай-патриотическай кулууп чилиэннэрэ уонча буолан кэлэн маспын хайытан, сааһылаан биэрдилэр. Эбиитин астаабыт бэрэскибин минньигэһиргэтэн, хайҕаан, тото-хана мотуйан үөртүлэр. Салайааччылара Семён Семёнович Килбясовы кытта бэйэ-бэйэлэригэр эрэнсэр, иллээх сыһыаннаахтара тутатына көстөр. Ол олус үчүгэй! Оҕолорго махталбын тириэрдэбин уонна ситиһиилэри баҕарабын», — диэн Амма нэһилиэгин олохтооҕо, үлэ бэтэрээнэ Дария Васильева санаатын үллэстэр, махталын биллэрэр.
«Амма олоҕо» хаһыат