Н.Е.Иванов аатын Бөтүҥ орто агрооскуолатыгар Өрөспүүбүлүкэ Судаарыстыбаннаһыгар анаммыт таһаарыылаах нэдиэлэ буолан ааста.
Нэдиэлэбит бастакы күнүн өрөгөй ырыалаах, Сахабыт сирин былааҕын өрө көтөҕөн үөрэнээччилэр уонна учууталлар сахалыы таҥастаах линейкаҕа көрүстүбүт. Иккис күммүтүгэр, 5-8 уонна 10 кылаас үөрэнээччилэрэ «Төрөппүттэрим, оскуолам, нэһилиэгим инники кэскилэ» диэн бырайыак оҥорон, көмүскээтилэр. Манна, оҕолор 4 хамаандаҕа арахсан талан ылбыт тиэмэлэри ырытан, үтүө уонна итэҕэс өрүттэри булан, бу кыһалҕалары хайдах суох оҥоруохха сөбүн быһаардылар, санаа атастастылар. Онтон, үһүс күммүтүгэр үтүө сылаас күн турбутугар оскуола оҕото бары үгэс быһыытынан, Ытык сирдэринэн айаҥҥа туруннубут. Бу үгэспит, номнуо сэттис сылын ыытыллар. Барыахпыт иннинэ линейкаҕа, аһаҕас халлаан анныгар айылҕаҕа буолар уруок туһунан сиһилии сырдаттыллар, ытык сиргэ тиийэр маршруппут былаанын ыйан-кэрдэн биэрдилэр. Бырайыак ааптара бэтэрээн учуутал Светлана Илларионовна Нестерева кэргэнэ — олохтоох краевед Нестерев Алексей Михайлович кэлэн эҕэрдэлэрин эттилэр. Светлана Илларионовна 2 кылаас оҕолорунаан өбүгэбит Лөглү Бөҕө пааматынньыгар барсан, үһүйээни сырдатта. Алексей Михайлович «Хотуйа төрдүгэр» 8-с кылаастары кытары сылдьан кэллэ. Кылаас аайы атын-атын маршруттаахпыт. Ытык сирдэргэ тиийэн кимнээх эрэ үһүйээннэр, атыттар историческай чахчылар туһунан болҕойон иһиттибит, «Амма ытык сирдэрэ» диэн альбом-каталогтан аахтыбыт уонна бэриллибит сорудахтары толордубут. Сорудахтарга араас боппуруостар бааллар: ытык сиргэ туох буолбутун бэлиэтиибит, тулалыыр эйгэбит бөҕүн-сыыһын хомуйабыт, хоһоон айабыт, үүнээйилэри үөрэтэбит, хаартыскаҕа түһэбит, видео оҥоробут уо.д.а. Ордубут бириэмэҕэ сынньана таарыйа оонньоотубут, аһаатыбыт.
Маны, таһынан «Аныгы оҕону иитии ситимэ» диэн төрөппүттэргэ аналлаах уопсай мунньах буолла. Уратыта диэн төрөппүттэр уонна учууталлар сахалыы таҥастаах кэлбиттэр. Мунньах өрөгөй ырыатыттан саҕаланна. 2024 сыл Арассыыйаҕа Дьиэ кэргэн сылынан, Саха сиригэр Оҕо саас сылынан оскуола дириэктэрэ Акулина Семеновна Иванова 2023-2024 үөрэх дьылын түмүгүн, оҕолор ситиһиилэрин, ыытыллыбыт тэрээһиннэри уонна быйылгы былааны билиһиннэрдэ. Салгыы дириэктэри үөрэх-иитии чааһыгар солбуйааччы Мария Денисовна Иванова оҕолорго ыытыллыбыт курдук бырайыактааһыны төрөппүттэргэ ыытта. Бөлөхтөргө талан ылбыт тиэмэлэрэ: «Үөрэхтээһин», «Иитии», «Үлэҕэ туһаайыы», «Цифровизация дьайыыта». Кыттыбыт төрөппүттэр санааларын үллэһиннилэр. Дириэктэри үөрэх-иитии чааһыгар солбуйааччы Егорова Жанна Ивановна оҕолор бырайыактарын, баҕа санааларын төрөппүттэргэ сырдатта.
Түмүккэ, туох барыта дьиэ кэргэнтэн саҕаланарын, олох сайдыытын сөпкө туһанан биир ситимҥэ, биир санаанан үлэлээтэххэ табыллар диэн санааҕа кэллилэр. Биһиги уонна төрөппүттэрбит этиилэрин учууталлар кыаллар соҕустарын төрөппүттэри кытта тэҥҥэ олоххо киллэриэх буоллулар. Онтон нэһилиэккэ туһаайыылаах этиилэри сурукка тиһэн олохтоох дьаһалтаҕа тиксэрдибит. Хас биирдиибит улаатан дьоммут, нэһилиэкпит, улууспут туһугар үлэлиэхпит. Сайда-үүнэ тур Сахабыт сирэ!
.
Виолетта ИВАНОВА, Латифа МАРКОВА, Медиа пресс чилиэннэрэ