Кэлэр сыл тыа хаһаайыстыбатын салаатын үбүлээһиҥҥэ кэккэ уларыйыылары киллэриэ. Манан сиэттэрэн улуус дьокутааттарын Сэбиэтин аграрнай хамыыһыйата тэрээһиннээх хаһаайыстыба, бааһынай хаһаайыстыба салайааччыларын ыҥыран дьүүллэһии ыытан, санааларын иһиттэ.
“Билэргит курдук 2025 сыл тохсунньутуттан тыа хаһаайыстыбатын боломуочуйалара бүтүннүү улууска бэриллээри тураллар. 2012 сылтан боломуочуйалар бааллар эрээри, үп-харчы тыырыллан кэлиитэ чопчу салааларынан ыйыллар буолара. Билигин көрүллэр суума барыта уопсай кэлэн, ханнык салааҕа, көрүҥҥэ үбүлээһини оҥорорбут, улуус боломуочуйата буолла. Ол эбэтэр бэйэбит көрөн, кэлбит үбү-харчыны тыырыахтаахпыт. Ити гынан барар параметрдар син бэриллэн, былааны толорорго үлэлиэхтээхпит. Дьэ ол чэрчитинэн, кэлэр сыл бюджетин көрүөх иннинэ, тэрээһиннээх хаһаайыстыбаларбыт уонна бааһынай хаһаайыстыбаларбыт салайааччыларын мунньан кэпсэттибит, бюджети билиһиннэрдибит, санааларын иһиттибит. Манна кыттыыны улуус дьокутааттара, аграрнай хамыыһыйа бэрэссэдээтэлэ Александр Фомин, чилиэннэр Валентин Петров, Василий Тимофеев, управлениебыт экономиһа, кылаабынай зоотехник, племзоотехник ыллылар.
Кэлэр сылга тыа хаһаайыстыбатыгар көрүллэр үбүлээһини үрдэттибит. Ону өссө бюджетнэй хамыыһыйаҕа уонна сессияҕа көрүөхпүт. Биллэн туран мөккүөрдээх санаа ордук улаханнык сүөһү төбөтүгэр уонна үүккэ харчыны тыырыыга турар. Ол гынан баран биһиги улууспутугар тыа хаһаайыстыбатын бары салаатын атарахсыппакка сайдарын курдук үлэни ыытыахтаахпыт. Урукку курдук бурдукка, түргэнник ситэр салаа сайдыытыгар бэриллэр чэпчэтиилэр баар буолуохтара. Кэлбит салайааччылар бары санааларын этэн, этиилэрин киллэрэн бардылар”, — диэн улуус дьокутааттарын Сэбиэтин бэрэссэдээтэлин солбуйааччы, тыа хаһаайыстыбатын управлениетын салайааччыта Ион Кононов сырдатта.
Улуус дьокутааттарын бу сылга бүтэһик сессията ахсынньы 26 күнүгэр былааннанар.
“Амма олоҕо” хаһыат