Дьокуускай куоракка Былатыан Ойуунускай аатынан Саха тыйаатырын сценатыгар Абаҕатааҕы У.Г.Нохсоороп аатынан духуобунас киинэ, «Маска» оҕо театральнай студията «Сырдык аартык» диэн испэктээк көрдөрөн, үгүс дьон үрдүк сыанабылын ылар чиэскэ тигистэ.
Испэктээх биир дойдулаахпыт Илья Семёнов — Ураанай уола суруйбут историческай драматынан турда. Манна туруорааччы — режиссёр Евгения Попова хас биирдии оонньуур артыыһын таба көрөн, оруолунан арааран, испэктээҕи ураты тыыннаах, дьон уйулҕатын таарыйар гына туруоран, үлэтин сүүс бырыһыан ситиһилээхтик оҥордо. Сэрии ыар сылларыгар Георгий Васильевич Трифонов салайыытынан тэриллэн үлэлээбит Абаҕатааҕы детдом дьиэтэ элбэх оҕо олоҕун быыһаабыта.
“Аҕа Дойду сэриитин кэмигэр үгүс оҕо дьылҕатын өрүһүйбүт, дьиэ кэргэн олоҕун тэрийбит Ытык кыһа туһунан, олоххо буолан ааспыт чахчыларга олоҕурбут Ылдьаа Сэмэнэп — Ураанай уола суруйуутугар «Сырдык аартык» испэктээхпит Былатыан Ойуунускай аатынан Саха тыйаатырын үрдүк сыанатыгар ситиһиилээхтик турбутуттан олус диэн үөрдүбүт, долгуйдубут. Бу туруоруу тула өттүттэн эргиччи суолталаах, ис хоһоонноох буолан биэрдэ. Ол курдук, Арассыыйаҕа — Дьиэ кэргэн, Саха Өрөспүүбүлүкэтигэр — Оҕо саас, култуура эйгэтигэр — Оҕо тыйаатырын сылыгар сөп түбэһэн турда.
Ону сэргэ киэн туттар биир дойдулаахпыт сүдү режиссер, РСФСР уонна ЯАССР үтүөлээх артыыһа Федот Федотович Потапов төрөөбүтэ 95 сылыгар ананна. Саха тыйаатыра уонна Федот Потапов дьиэ кэргэнэ бу үлэ тахсыылаах, үрдүк таһымнаах буоларыгар тэрийсэн-салайсан, иилээн-саҕалаан сүргэбит көтөҕүлүннэ, үөрүүбүт үрдээтэ. Федот Потапов аатын сүгэр «Маска» устуудьуйа оҕолоро ис сүрэхтэриттэн иэйэн, долгуйан, дьиҥ чахчы астынан туран оонньообуттарыттан киэн тутуннубут, махтанныбыт, долгуйдубут. Бу күн кыттааччылар, көрөөччүлэр, ыҥырыылаах ыалдьыттар ураты сырдык эйгэҕэ киирэн, бииргэ ситимнэһэн кырдьык дьоллоох дьоро киэһэ буолла. Махтал, таптал, үтүө буоллун бу биир тыыҥҥа олорсубут, бу эйгэни олохтоспут бар дьоммутугар! Тыйаатыр сүдү күүһүнэн, историяны кэрэһэлээн, кэлэр кэнчээри ыччаппытыгар үтүө өйдөбүлү сахтахпыт буоллун!», — диэн режиссер Евгения Попова санаатын үллэһиннэ.
Манна даҕатан эттэххэ, тыйаатырга аан маҥнай сылдьар киһи ханнык баҕар испэктээк ураты тыыныгар уйдаран, санаатын, олоҕу көрүүтүн тосту уларытыан, тыйаатыр туспа олохтооҕун этинэн-хаанынан өйдүөн сөп.
“Оҕолор оонньуулара, оруолларын толоруулара киһини эрэ сөхтөрөр, астыннарар. Хас биирдии оҕо характеры, майгыны-сигилини киһини итэҕэтэрдии арыйара манньытар да, үөрдэр да, уйадытар да…Манна Амма үөрэҕин кыһалара, чуолаан Абаҕа оскуолатын оҕолоро өй-санаа мөккүһэр уустук кэмнэригэр ийэ дойдуну таптааччы, харыстааччы, сайыннарааччы суолунан сөптөөхтүк баран иһэллэрэ хайҕабыллаах”, — диэн испэктээҕи көрбүт дьон санааларын тириэрдэллэр.
Гаврил ПРОКОПЬЕВ, Абаҕа орто оскуолатын IX кылаас үөрэнээччитэ