Чурапчыга кулун тутар 30 күнүгэр инноватор-педагог, мелодист, автор Николай Сибиряков төрөөбүтэ 65 сылыгар анаммыт онус төгүлүн өрөспүүбүлүкэтээҕи «Добун дорҕоон түһүлгэтэ -2024» диэн тыыннаах муусука аһаҕас күрэҕэ ыытылынна. Бу күрэххэ Амма улууһуттан үс вокальнай-инструментальнай бөлөх баран ситиһиилээхтик кыттан кэллилэр.
„Маннык күрэххэ биһиги бөлөх бастакы холонуубут. Тэрээһинтэн астынан, элбэх уопут ылан төнүннүбүт. Күрэх дьүүллүүр сүбэтин бэрэссэдээтэлэ «Чороон» тыыннаах бөлөх бастакы солиһа Петр Федорович Макаров буолла. Ону кытта чилиэннэринэн СӨ культуратын үтүөлээх үлэһитэ, Чурапчы улууһун бочуоттаах олохтооҕо, » Табык» рок бөлөх салайааччыта Дмитрий Дмитриевич Попов, физическэй культура уонна спорт туйгуна, тыыннаах музыка пропагандиһа Виктор Семенович Дьяконов, тыыннаах музыка пропагандиһа Иван Иванович Дегтярев, СӨ суруйааччыларын сойууһун чилиэнэ, Саха Республикатын культуратын үтүөлээх үлэһитэ Виктор Павлович Стручков үлэлээтилэр. Кинилэр бэлиэтээбиттэринэн сылын аайы кыттааччылар элбээн, музыкальнай таһымнара үрдээн иһэр, араас улуустартан кыттыылара кэҥиир. Ол курдук, Орто Халыматтан, Усуйаанаттан, Сунтаартан, Амматтан, Тааттаттан, Мэҥэ Хаҥаластан, Дьокуускайтан, Хатастан, барыта 19 тыыннаах музыканы оонньуур бөлөх күөн көрүстэ. Итинтэн 11 бөлөх — оҕолор. Кырдьык да бу күрэх үрдүк таһымнааҕын көрдүбүт, тыыннаах дорҕоон сүппэтин, ситимэ салҕанан, Чурапчы улууһугар күүстээх үлэ бара турарын сөҕө- махтайа көрдүбүт, иһиттибит. Биир дойдулаахтарбыт Амматтан «Ойдуо» улахан дьон, Соморсунтан «Ыллыктар» оҕолор, Абаҕаттан «Дьүкээбил» оҕолор бөлөхтөрө буолан күрэхтэһиигэ улууспут, нэһилиэктэрбит чиэһин баарбытын биллэрэн көмүскээтибит. Түмүккэ «Ой Дуо», «Ыллыктар» 1-кы степеннээх лауреат аатын, саҥа хардыылары оҥорон эрэр «Дьүкээбил» бөлөххө «Дорҕооҥҥо дьулуур» диэн биһирэбил аат ылан дойдубутугар үөрэн-көтөн кэллибит. Күрэх быыһыгар тэрийээччилэр ыыппыт маастар кылаастарга сылдьан оҕолорбут элбэх саҥаны биллилэр, санаа атастастылар, инникигэ күүстээх тирэх ыллылар. Күрэххэ тэрийэн кытыннарбыт нэһилиэкпит аҕа баһылыгар Максим Владимирович Семеновка, бэйэтин көлөтүнэн оҕолору тиэйбит төрөппүппүтүгэр Алексей Николаевич Гоголевка махталбытын тиэрдэбит“, — диэн Абаҕаттан «Дьүкээбил» ВИА салайааччыта Роберт Захаров сырдатта.
„Амма олоҕо“ хаһыат