Амматааҕы О.П. Иванова-Сидоркевич аатынан оҕо айар сайдыы киинэ үлэлэтэр “Дьөһөгөй – сир эдэр хаһаайыннара” Дойду бэрисидиэнин фондатын Гранын чэрчитинэн Абаҕа нэһилиэгэр И.Я.Строд аатынан хаһаайыстыба сылгы иитэр хааһаҕар Н.Е.Иванов аатын Бөтүҥ орто агро оскуолатын 10-с кылааһын уолаттара убаһа астааһыныгар кыттыстыбыт.
Биһигини Строд аатынан хаһаайыстыба салайааччыта Василий Васильевич Тимофеев көрсүбүтэ. Бу күн хаһаайыстыба үлэһиттэрин кытта икки убаһаны астаһан элбэххэ үөрэннибит. Өссө киһи доруобуйатыгар олус туһалаах, иҥэмтэлээх сылаастыы убаһа көхсүн хаанын иһэн амсайдыбыт. Көмөлөспүппүтүн иһин хаһаайыннар биир буут эти кэһии быһыытынан биэрдилэр.
Оскуолабыт аатыттан алгыстаах Абаҕа сэмэй, ыалдьытымсах, үлэһит дьонугар, ону тэҥэ салайан илдьэ сылдьыбыт Бөтүҥ орто оскуолатын завхоһугар Онуфриев Егор Егоровичка, техниканан хааччыйбыт олохтоох дьаһалта баһылыгар Никитин Алексей Николаевичка, суоппар Максимов Афанасий Константиновичка махтанабыт. Үөрэн-көтөн илии тутуурдаах, өттүк харалаах кэллибит. Бу үтүө сыаллаах бырайыак өсссө да сайдан истин, элбэх оҕону олоххо үөрэттин.
Эрнест ДЬЯКОНОВ, ГОША МАРКОВ, “Платформа” медиа киин чилиэннэрэ