Лиссиэй үөрэнээччилэрэ учууталларын идэлээх бырааһынньыктарынан эҕэрдэлээтилэр.
Академик Л.В.Киренскэй аатынан Амма лиссиэйин үөрэнээччилэрэ учууталларыгар анаан сэргэх кэнсиэр көрдөрдүлэр. Кэнсиэр нүөмэрдэрин «Үрдэл» оҕо хамсааһынын активистара хас биирдии кылааска баһаатай буолан, бэйэлэрэ бэлэмнээтилэр.Бу күн ис сүрэхтэн тахсар эҕэрдэ тыллары кытта, учууталларын көрдөөх интервьюнан сэргэхситтилэр, булугас викторинанан тургутан көрдүлэр. Маны сэргэ, оскуоланы бүтэрбит кэккэ сыллардааҕы выпускниктар дойду араас муннуктарыттан эҕэрдэ, махтал тылларын ыытан, үөрэппит учууталларын долгута үөртүлэр. Аны сарсын, субуота күн, лиссиэй үрдүкү кылааһын оҕолоро учууталларын солбуйан, бэйэни салайыныы күнүн ыытыахтара.
Наталия РЯЗАНСКАЯ
