Эмис нэһилиэгин “Чуораанчык” уһуйаан олоҥхо декадатын сабар үөрүүлээх тэрээһинэ бэрт сэргэхтик буолан ааста. Араас күрэхтэр тэриллэн кэлбит ыалдьыттар, оҕолор астынан, уһуйаан үлэтин биһирээн бардылар.
Үөрүүлээх чааска уһуйаан иитиллээччилэрэ ыалдьыттары арыылаах алаадьынан көрүстүлэр. Сэбиэдиссэй Ирина Ноговицына эҕэрдэ тылын тириэрдэн, уһуйаан ситиһиитин кэлбит дьоҥҥо сырдатта.
“Биллэрин курдук 2024 сыл Амма улууһугар, Эмис нэһилиэгэр Олонхо сыла биллэриллибитинэн биһиги “Чуораанчык” уһуйааммыт былырыын сэтинньиттэн бу ахсынньыга диэри үчүгэй көрдөрүүлээх үлэлээн-хамсаан кэллибит. Биир улахан тэрээһиммитинэн «Чөмчүүк саас түһүлгэтэ — олоҥхо тойуга» диэн оскуолаҕа киириэн иннинээҕи саастаах оҕолорго олоҥхону олоҕурбут ньыманан толорууга күрэх буолар. Бу күрэххэ муҥутуур кыайыылааҕынан Мэҥэ Хаҥаластан Майатааҕы уһуйаан буолбута. Маны тэҥэ Олоҥхобут ыһыаҕар биһиги уһуйаантан биирдии үлэһит иккилии олбох тикпиппит, барыта холбоон уһуйаантан 46 устуука буолбута. Ону таһынан өрөспүүбүлүкэ үөрэх министиэристибэтэ Саха сиригэр Оҕо саас сылынан хас биирдии иитээччигэ уопуту тарҕатыы иһин сертификаттары, махтал суруктары туттарбыттара биһиэхэ үрдүк ситиһии буолар”, — диэн этэр Ирина Ивановна.
Бэтэрээн эбэлэрбитигэр, ыалдьыттарбытыгар анаан кырачаан оҕолорбут ылбаҕай ырыаны, ону тэҥэ биир дойдулаахпыт, филологическай наука кандидата Юрий Борисов “Барҕаһастаах аттаах баабый баатыр” олоҥхону бэлэх ууннулар. Нэһилиэкпит аҕа баһылыга Прокопий Бубякин кэлбит ыалдьыттарга, бэтэрээн учууталларга, махтанан оҕолорго бэйэтин баҕа санаатын эттэ. Бу күн “Далбардар” ансаамбыл салайааччылара, уһуйаан сыарҕалаах атынан бырайыагар тэҥҥэ үлэлэһэр Наталья Константинова, “Эрэкэ-дьэрэкэ” фольклорнай куруһуок салайааччыта Матрена Владимирова, Е.А. Захарова- Саха Күөрэгэйэ аатынан култуура киинин дириэктэрэ Анжелика Иванова, “Көлүкэчээн” түмсүү салайааччыта Ольга Михайлова күндү ыалдьыт буолан эҕэрдэ тылларын этэн, өйдөбүнньүк бэлэхтэрин туттардылар. Кэлбит дьоҥҥо “Чуораанчык” уһуйаан иитээччитэ Лена Тихонова ыытар үлэни слайданан көрдөрөн кэпсээтэ. Салгыы төрөппүттэр оҕолорун кытта “Олоҥхо дойдута, мин дойдум” диэн квест-оонньууларыгар барыта 8 хамаанда кытынна. Түмүккэ 1 үрдэл – Уйгулаана Павловна, Саша Сысолятиннар, 2 үрдэл — Прасковья Андреевна, Кэрэчээнэ Афанасьевтар, 3 үрдэл — Майя Владиславана, Давид Новиковтар буоллулар. Бары кыттааччылар туоһу суругунан наҕараадаланнылар. Онтон «Олоҥхо оонньуура — биһиги дьиэ кэргэҥҥэ” диэн күрэххэ 3 үрдэл – Прасковья Андреевна, Кэрэчээнэ Афанасьевалар, 2 үрдэл — Евдокия Авдеевна, Афоня Бубякиннар, 1 үрдэл Майя Владиславовна, Давид Новиковтар буоллулар. «Олоҥхо биһиги дьиэ кэргэҥҥэ» күрэххэ барыта 10 дьиэ кэргэн кытыннылар. Манна 1 үрдэлгэ Тимофеевтар, 2 үрдэлгэ Ларионовтар, 3 үрдэлгэ Рожиннар дьиэ кэргэн таҕыстылар.
Ити курдук олоҥхо дэкээдэтигэр “Чуораанчык” уһуйаан элбэх күрэхтэри тэрийэн, сахалыы сандалы астаах остуол тардан, ыалдьыттар ол тула кэпсэтэн, сахалыы ойулуктары көрөн, махтанан,үөрэн- көтөн, үрдүк таһымнаах бырааһынньыгы сэргээн тарҕастылар.
Эрчим НИКОЛАЕВ