Амма Наахара нэһилиэгин биир бастыҥ салайааччыта Полина Петровна Кононова салайар Өрөспүүбүлүкэҕэ, Бүтүн Арассыыйаҕа биллэр экологическай хайысхалаах «Дуораанчык» уһуйаана саҥаттан саҥа үлэ сүүрээннэрин олоххо киллэрэр. Аҕыйах хонуктааҕыта уһуйаан иһинэн иитээччилэр айар үлэлэрин өссө сайыннарар, кинилэр толкуйдаан оҥорбут үлэлэрин өйөөн саҥа уһуйаан тиэргэнигэр саҥалыы «Экологическай ыллыгы» киллэрэр сыаллаах бырайыак оҥоруутун күрэҕэ ыытылынна.
Бырайыактары суруйууга уһуйаан иитээччилэрэ, исписэлиистэр үс хамаандаҕа арахсан үлэлээтилэр. Иитээччилэр үстүү киһилээх хамаандалара олус көхтөөхтүк кытыннылар. Бырайыак уопсай тутулун сөпкө икки хамаанда толору тутуста. Бырайыакка саҥаны киллэрии, оҕо интириэһин тардыы, үөрэтэр кыаҕар таба тайаныы болҕомтоҕо уурулунна. Түмүккэ 2-с хамаанда бастакы, 1-кы хамаанда иккис, 3-с хамаанда үһүс миэстэҕэ таҕыстылар.
Экспертарынан сэбиэдиссэй Полина Кононова, сүрүннүүр иитээччи Галина Мартынова, төрөппүт кэмитиэтин бэрэссэдээтэлэ Айталина Филиппова болҕомтолоохтук үрдүк таһымҥа үлэлээтилэр. Түмүккэ бырайыак үлэтигэр экспертар маннык этиилэри киллэрдилэр. Бырайыак оҥорорго тутулун тутуһарга, Наталья Рыжова «Наш дом — природа», Галина Мартынова «Познаю мир родной природы» экологияҕа сыһыаннаах анал кинигэлэргэ экологическай ыллыкчаан үлэтин ааҕарга сорудах биэрдилэр. Бу үс бырайыактан үчүгэйдэрин талан ылан биир бырайыак оҥорон олоххо киллэрэргэ, барылы төрөппүт уопсай мунньаҕар иһитиннэрэргэ диэн этии киллэрдилэр.
«Инникитин саҥа таас уһуйааммытыгар экологическай ыллык оҥоһулларын ситиһэн, мини-метеостанцияны туруоран саас үлэбитин саҥалыы оҥорон сөхсүтүөхпүт. Хамаандалар дипломнары, иитээччилэр, экспертар, актыыбынай кыттыы иһин сертификаттары туттулар», — диэн уһуйаан сүрүн иитээччитэ Галина Мартынова билиһиннэрдэ.
Ирина КОРЯКИНА-ОЛЕСОВА