В. М. Новиков-Күннүк Уурастыырап аатынан Эмис орто оскуолатыгар «Килиэп күнэ» диэн ураты күн ыытылынна. Бу күн оҕолор килиэп киһи олоҕор туох уһулуччу суолталааҕын биллилэр.
Оскуолабытыгар ыытыллыбыт “Килиэп күнүгэр” уруоктар быыстарыгар буолар сынньалаҥ кэмигэр килиэп туһунан ойуулугу, умсугутуулаах ааҕыыны иһиттибит. Үрдүкү кылаас үөрэнээччилэригэр килиэп туһунан оскуолабыт бибилэтиэкэрэ Ульяна Захарова дьоһуннаах кэпсэтиини тэрийдэ.
«Билигиҥҥи үйэҕэ оҕо да, улахан да дьон аска сыһыана уларыйда. Кырдьык аныгы кэмҥэ, бурдуктан араас эгэлгэ ас дэлэгэй буолан, оҕолор ыһа-тоҕо аһыыллара, сирэллэрэ баар суол. Онтон, хаһан эрэ биһиги олохпут историятыгар олус ыар кэмнэр кэлэн ааспыттарын умнарбыт табыллыбат. Холобур, Аҕа дойду улуу сэриитин кэмигэр төһөлөөх элбэх киһи аччыктаан, хоргуйан, күн сириттэн бараахтаабыта буолуой! Ол оҕолор барахсаттар килиэп сиир дьоро күннэрэ олоххо эрэли үөскэтэрин санаатахха киһиэхэ аһынар, ол оҕолорго тиийэн көмөлөспүт киһи диэн үтүө санаа, иэйии үөскүүр эбит. Бу билиҥҥи олоххо туох барыта баарын да иһин, мин баҕарыам этэ аһыыр аска, кэтэр таҥаска харыстабыллаахтык сыһыаннаһыҥ», — диэн Ульяна Устиновна диэн этиитин бары олус долгуйа иһиттибит уонна ураты толкуйга киирэн тарҕастыбыт. Маннык истиҥ, оҕо дууһатын таарыйар кэпсэтиилэр өссө да буола турдуннар.
Айна УСТИНОВА, 6-с кылаас үөрэнээччитэ.