Эмис нэһилиэгин үс көлүөнэ Герой Ийэ Новиковтар дойдубут тэбэр сүрэҕэр- Москуба куоракка Арассыыйаҕа Судаарыстыбаннай Дума бэрэссэдээтэлэ Вячеслав Володин көҕүлээбит “Ийэ — сүрүн тыл” диэн ааттаах «Дьиэ кэргэн» сылын чэрчитинэн улахан тэрээһиҥҥэ кыттыыны ыла сылдьаллар. Ытык кырдьаҕас, 85 сааһын томточчу туолбут, Герой Ийэ Татьяна Никифоровна Новикова бу улахан бэлиэ тэрээһиҥҥэ тус бэйэтэ кыттарыттан дьоллоох.
Судаарыстбыннай Дума улахан дьиэ кэргэҥҥэ анаан ыыппыт тэрээһинигэр Эмис нэһилиэгиттэн үс көлүөнэ Герой ийэ кытынна. Ол курдук бастакы көлүөнэ Герой-ийэ кыыһа — Мария Степановна Новикова, иккис көлүөнэ Герой-ийэ, 85 саастаах Новикова Татьяна Никифоровна кыыһа Новикова Елена Петровна уонна икки сиэн кыргыттара, үһүс көлүөнэ Герой-ийэ Устинова Туйара Петровна, биэс оҕотунаан, 2 сиэнинээн.
“Биһиги Москваҕа уон буолан көтөн кэлбиппит. Биһигини кытта ийэбит, эбэбит, хос эбэбит Татьяна Никифоровна тэҥҥэ баарыттан наһаа дьоллоохпут. Саастаах киһи айаны хайдах тулуйара буолла диэн сэрэнэ санаабыппыт. Ол гынан баран ийэм хата этэҥҥэ тулуйда. Кини “Көлүкэчээн” ансаамбылын кытта Москваҕа кэлэ сылдьыбыттаах.
Нэһилиэктэргэ сылдьааччы. Онон айанныырга үөрүйэхпин диэн биһигини кытта үөрэ-көтө сылдьарыттан дьоллоохпун. Манна биһигини наһаа үчүгэйдик көрсөн, бука барыбытын үчүгэй баҕайы гостиницаҕа түһэрбиттэрэ. Ахсынньы 15 күнүгэр көтөн кэлбиппит. Москваҕа Судаарыстыбаннай Думаҕа дьокутааппыт Галина Иннокентьевна Данчикованы кытта олус истиҥ көрсүһүү буолла. Онно биһиги нэһилиэкпит оскуолата эргэрэн, хаарбах туруктааҕын этэн туран, оскуола-сад тутуутун туруорустубут. Ону кытта Кремльгэ, Колоннай саалаҕа сырыттыбыт.
Бэртээхэй кэнсиэр көрдүбүт. Манна элбэх биллиилээх дьону кытта көрсүстүбүт. Коммунистическай партия лидэрэ Геннадий Зюганов кэлэн эҕэрдэлээн, тэҥҥэ хаартыскаҕа түстүбүт. Бу тэрээһиҥҥэ Арассыыйа араас муннуктарыттан элбэх биллэр дьиэ кэргэннэр кэлбиттэр. Холобура бары пограничник дьиэ кэргэн. Судаарыстыбаннай Дума быйыл бэйэтэ анал мэтээл олохтообут. Ону аҕыйах дьиэ кэргэҥҥэ туттардылар.
Ол иһигэр биһиэхэ. Бу тэрээһиҥҥэ тэрийэн ыыппыт бар дьоммутугар дириҥ махталбытын тириэрдэбит”, — диэн Герой ийэ Туяра Устинова кэпсээтэ.
Улахан дьиэ кэргэн сарсын Дьокуускайга көтөн кэлэллэр.
“Амма олоҕо” хаһыат