Улуус баһылыга “Дыгын оонньууларын” үрүҥ көмүс призерун кытта көрүстэ

Амма улууһун баһылыга Степан Кузьмин быйыл Туймаада ыһыаҕар ыытыллыбыт “Дыгын оонньууларыгар” улуус чиэһин ситиһиилээхтик көмүскээбит Борис Сдвижковы кытта көрүстэ. Көрсүһүүгэ кыттыыны Чапчылҕан нэһилиэгин баһылыга Дьулустан Юшков эмиэ ылан,  эҕэрдэтин тириэртэ.


Быйылгы “Дыгын оонньуулара” бэрт тыҥааһыннаахтык баран, бүтэһиккэ диэри ким кыайыылаах тахсара биллибэт этэ. Бастакы күн түмүгүнэн Амма улууһун аатыттан кыттан чиэстээтик көмүскээбит Борис Сдвижков эрэллээхтик иккис миэстэлээх этэ. Уолбут бу тиэмпэтин ыһыктыбакка,  күүстээх утарсааччылар ортолоругар кыайыылаахтан 3 эрэ очконон хаалан иккис миэстэ буолбута. Улуус баһылыга  Степан Кузьмин спортмены кытта көрсөн, махтанан уонна эҕэрдэлээн туран 100 000 солк сертификаты, бухатыыр батыйатын уонна “Амма киэн туттуута” бэлиэни туттарда. Онтон Борис олорор нэһилиэгин баһылыга Дьулустан Юшков биир дойдулааҕын үөрэн-көтөн туран 80 000 солк сертификатынан наҕараадалаата.

“Биһиги Туймаада ыһыаҕар киирэн уолбут киирсэрин көрөн, киниэхэ “ыалдьа” олорбуппут. Борис чахчы улахан кыахтааҕын көрдөрдө уонна мин саныахпар олус үчүгэйдик кииристэ. Кини кыаҕа-күүһэ улаатан иһэрэ, өрөспүүбүлүкэ ааттаахтарын кытта тэбис тэҥҥэ киирсэн улууһун аатын иккис үрдэлгэ таһаарбытыгар биһиги дириҥник махтанабыт. Кини өссө да ситиһиитэ иннигэр. Өр сыллаах, тулуурдаах, дьаныардаах дьарыга Бориска кыайыылары эрэ аҕаллын, улууһун өссө да ааттата турдун. Улуус дьаһалтата маннык кыахтаах уолаттарбытын өйүүбүт уонна өйүү да туруохпут ”, — диэн Степан Николаевич санаатын үллэстэр.

Көрсүһүүгэ итини сэргэ улуус баһылыгын бастакы солбуйааччы Василий Бураев, спорт уонна физическэй култуура управлениетын салайааччыта Дмитрий Наумов кыттыыны ылан, спортсмены эҕэрдэлээтилэр.

“Амма олоҕо”  хаһыат