Сэтинньи 5 күнүгэр ыытыллыбыт улуус баһылыгын планеркатыгар грипп утары прививканы ылыыга, баһаартан сэрэхтээх буолууга, эрдэ турбут соруктары толорууга ураты болҕомтону уурарга этилиннэ.
Улуус баһылыга Степан Кузьмин уочараттаах нэдиэлэ түмүктэрин таһаарар, саҥа былааннары торумнуур планеркатыгар нэһилиэк баһылыктара, сорох тэрилтэ салайааччылара ВКС нөҥүө кытыннылар. Баһылык планеркатын саҕаланыытыгар сэтинньи 13 күнүгэр бастакы Бэрэсидьиэн Михаил Николаев төрөөбүт күнүн чэрчитинэн былааннаах тэрээһиннэри ыыталларыгар, былаан бу нэдиэлэҕэ оҥоһуллан бигэргэниэн наадатын, улууска тахсыбыт баһаардар хатыламматтарын курдук бары тэрилтэ салайааччылара, нэһилиэк баһылыктара болҕомтолорун ууралларыгар сорудахтаата. Маны сэргэ сэтинньи 9-10 күннэригэр Эмис нэһилиэгэр “Баһылык муҥхата” тэриллэрин, манна бары нэһилиэктэр көхтөөх кыттыыны ылалларыгар эттэ.
Планеркаҕа иһитиннэриилэри управлениелар салайааччылара, улуус баһылыгын солбуйааччылара оҥордулар, нэдиэлэ устата туох тэрээһиннэр буолбуттарын, ханнык быһаарыллыбакка турар боппуруостар баалларыгар тохтоотулар, үүммүт нэдиэлэ былаанын билиһиннэрдилэр. Тыа хаһаайыстыбатын управлениетын салайааччыта Ион Кононов иһитиннэрбитинэн быйыл кыстыкка ааспыт сыл кур отун ааҕан туран 90 бырыһыан оттоох киирбиттэрин, эбии аһылык да баарын этэн туран, быйылгы кыстыкка сылгылар уонна биэлэр мөлтөх туруктаахтарын эттэ. Онон чэпчэтиилээх бэйэ бурдугун хото атыылаһан, сылгы кыстыгар улахан болҕомтону уурар наадатын ыйда. Ол курдук «Амма» АУо комбикорманы 780 солк, эбиэһи 680 солк , онтон эбиэс бурдугу «Бөтүҥ» уонна Строд аатынан хаһаайыстыбалар 600-650 солк атыылыыллар. Улуус киин балыыһатын кылаабынай бырааһа Михаил Архипов бэлиэтээбитинэн, грипп утары вакцинацияны ылыыга Амма улууһа өрөспүүбүлүкэ үрдүнэн саамай бүтэһик миэстэҕэ сылдьарын, прививканы ылыы былаана баара 51 бырыһыаҥҥа тэҥнэспитин, бу нэдиэлэнэн прививканы ылыыны түмүктүүрү эттэ. Нэһилиэктэртэн Сулҕаччы нэһилиэгэ 100, Покровка 90 бырыһыан ылбыттарын, онтон Алтан нэһилиэгэ 32 бырыһыан эрэ прививкэлэнэн олорорун иһитиннэрдэ. Прививкэ кабинета сарсыарда 9 чаастан киэһэ 18 чааска диэри үлэлиирин, онон хайа баҕарар уочарата суох кэлэн ылыахха сөп эбит. “Муниципальнай сулууспа сакааһа” тэрилтэ салайааччыта Николай Новиков бэлиэтээбитинэн, «Эдэр дьиэ кэргэн” бырагырааманан дьиэ тутуутугар 7 мөл. солк тахса харчы өссө да туһанылла илик, маны баһылыктар болҕомтоҕо ылан сыл бүтүөр диэри кэлбит харчы толору туһаналлыгар үлэлэһиэхтээхтэр. Спорт управлениетын салайааччыта Дмитрий Наумов бу нэдиэлэттэн саҕалаан ГТО туттарыыта буоларын, сэтинньи 9 күнүгэр Амма нэһилиэгэр нэһилиэктэр комплекснай спартакиадаларын чэрчитинэн бильярд күрэҕэ ыытылларын эттэ.
“Амма олоҕо” хаһыат
Хаартыска: улуус дьаһалтатын пресс сулууспата