Саҥа дьыл -ураты бырааһынньык. Саҥа дьылга улаханыттан кыратыгар, кырдьаҕаһыттан эдэригэр тиийэ ким барыта бэлэх тутар, үөрэр -көтөр. Улуус дьокутааттара “Үтүө санаа елката” аахсыйаҕа кыттыһан, анал байыаннай дьайыы кыттыылаахтарын оҕолоругар бэлэхтэри туттардылар, ону сэргэ улуус инбэлииттэрин уопсастыбатын баҕа санаатын толордулар.
“Биһиги сыллата “Үтүө санаа елката” аахсыйаҕа кыттыһабыт. Бу сырыыга Ийэ дойдуларын көмүскүү сылдьар биир дойдулаахтарбыт оҕолоругар Саҥа дьыллааҕы бэлэхтэри туттардыбыт. Бу олус үтүө аахсыйа. Оҕолор үөрбүт-көппүт, дьолломмут сирэйдэрин көрөр наһаа долгутуулаах, үөрүүлээх. Хас биирдии дьиэ кэргэҥҥэ дьол эрэ тосхойдун, уолаттарбыт этэҥҥэ эргиллэн кэллиннэр диэн бу үүнэр сылга баҕарабыт.
Маны сэргэ бу Саҥа дьыл үүнээри турдаҕына, улуустааҕы инбэлииттэр уопсастыбалара “Корнхол” диэн оонньууга инвентарь ыларбытыгар көмөлөһүн диэн эппит баҕа санааларын толордубут. Бу оонньуу инбэлииттэр спартакиадаларыгар биир көрүҥүнэн киирэ сылдьар.
Онон кинилэр дьарыктаналларыгар, күрэхтэһиилэри да ыыталларыгар биһиги кыра көмөбүт күүс-көмө буолуо диэн эрэнэбит. Түгэнинэн туһанан бары улуус олохтоохторун Саргылаах саҥа дьылынан истиҥник эҕэрдэлиибин уонна туох баар кэрэни, сырдыгы, или-эйэни баҕарабын”, — диэн улуус дьокутааттарын Сэбиэтин бэрэссэдээтэлэ Владимир Колосов иһитиннэрдэ.
“Амма олоҕо” хаһыат