Бу күннэргэ 2025 сылга бары сурунаалларга уонна хаһыаттарга чэпчэтиилээх сурутуу декадата ыытылла турар. Ол иһигэр соҕотох улуускут хаһыатыгар эмиэ алтынньы 14 күнүгэр диэри чэпчэтиилээх сурутуу баар. “Амма олоҕор” сурут, улууһун олоҕун кытта тэҥҥэ буол.
Үгүс саастаах дьонтон “улууһум хаһыатын хайдах суруппат буолуохпунуй” диэн этиини истэр олус күндү. Маннык тыллары иһиттэхпитинэ биһиги үлэлиирбит, айарбыт -тутарбыт өссө күүһүрэр. Бэйэн улууһун хаһыатын суруппат буоллаххына, эн бэйэҕин Аммабын дэнэҕин дуо диэн ыйытыахха сөп. Билигин урукку курдук почта отделениетыгар тиийэн сурутар буолбатаххын. Дьиэҕэр олорон эрэ, хайа баҕарар кэмҥэ сурутуоххун сөп. Онно эйиэхэ төлөпүөн эрэ наада. Онон сурутар олус судургу буолбута. Кылаабынайа киһи баҕата, билиэн-көрүөн баҕарара.
“Амма олоҕо” хаһыакка сурутуу бары өртүнэн барыстаах. Бастатан туран улууһун олоҕун-дьаһаҕын барытын билэ олороҕун. Социальнай ситимҥэ тахсар сонуннартан манна олох атын, туспа матырыйааллар, хатыланар да буоллаҕына, барыта сиһилии суруллар. Иккиһинэн, биир сылга суруттаххына, сүүйүүлээх оонньууга кыттаҕын. Билэргит курдук былырыын Өлүөнэ холбоһуктаах өрүс пароходстватын генеральнай дириэктэрэ, Ил Түмэн дьокутаата Сергей Александрович Ларионов Элиэнэ очуостарыгар күүлэйдииргэ икки киһиэхэ путевка анаабыта. Ол путевканы Амма Наахара олохтоохторо Нина уонна Валерий Гаврильевтар сүүйэннэр балаҕан ыйыгар олус үчүгэйдик күүлэйдээн кэлбиттэрин туһунан сырдатан тураллар. Быйыл биһиэхэ бу путевканы өрөспүүбүлүкэҕэ “2024 сыл бастыҥ туроператор” аатын ылбыт “Якутиятрип” туристическай фирма спонсордаата.
Бу фирма туһунан биһиги өссө сырдатыахпыт. Өссө Дьокуускай куорат устун күүлэйдэтэр турфирма эмиэ от ыйыгар эмиэ путевка биэрэр. Бу фирма туһунан хаһыаппытыгар сырдатан турабыт. Ону сэргэ хаһан да буоларын курдук биир сылга толору суруппуттар истиэнэҕэ ыйанар 2025 сыл А3 форматтаах халандаарбытын тутуохтара. Путевканы сэргэ өссө атын бэртээхэй бириистэр баар буолуохтара. Онно холобура минньигэс бэйэ бородууксуйалаах Михаил Терентьев салайааччылаах “Мясная лавка” маҕаһыынтан сэртипикээт баар буолуо. Үсүһүнэн, хаһыакка суруйтардаххына, эн хаһан да сүүйүүтэ суох хаалбаккын, ытыскын соттубаккын. Биир сыл устата, 2025 сыл ахсынньы ыйа бүтүөр диэри улууһун хаһыатын ааҕаҕын, элбэҕи билэҕин. Быйыл биһиэхэ дьон сөбүлээн ааҕар “Тыа ыала”, араас кроссвордтар, интэриэһинэй кэпсээннэр, бастыҥ үлэлээх, идэлээх дьоммут туһунан суруйуулар, онтон да атын сонун таһаарыылар баар буолуохтара.
Билигин чэпчэтиилээх сурутууну туһанан 1534, 48 солк оннугар 1348 солкуобайга сыл устатыгар хаһыакка суруттар. Холобурдаан көрдөххө, билигин 1000 солкуобайга кырачаан бородуукта атыылаһаҕын. Онтун күнүнэн бүтэр. Көрө-истэ сылдьаргыт курдук, холобура биир халбаһыы сыаната 580-700 солкуобай, ынах арыыта 1300 солкуобай…
Убаастабыллаах ааҕааччыларбыт! Билигин социальнай ситим сайдан аҕай турар кэмигэр, кумааҕынан хаһыат сурутуута кырдьык уустуктук барар. Ол гынан баран биири өйдүөххэ наада. Сурутааччы баар- хаһыат баар. Аҕыйах киһи сурутан ааҕар буоллаҕына, бу улууска хаһыат тахсара оруна суох буолан, сабыллар. Онтон биһиги хаһыаппыт өрөспүүбүлүкэ биир кырдьаҕас хаһыата буолар. Ааспыт сылга кини 90 сылын бэлиэтээбиппит. Онон маннык дириҥ силистээх-мутуктаах хаһыат өссө салгыы тахса турарын, Амма улууһа бэйэтэ хаһыаттаах буоларын туһугар бэйэҕит соҕотох хаһыаккытын сурутан ааҕыаххыт диэн эрэнэбит. Онтон хаһыат интэриэһинэй буоларын туһугар биһиги кэлэктииппит бары күүһүн уурар.
Наталья Бубякина, хаһыат кылаабынай эрэдээктэрэ