Алтынньы 14 күнүттэн 18 күнүгэр диэри бары сурунаалларга, хаһыаттарга чэпчэтиилээх сурутуу буолан ааста. Бу кэмҥэ үгүс үтүө дьоммут саастаах дьоннорго улуус хаһыатыгар сурутан биэрэн үөрүүлэрин үксэттилэр.
Балаҕан ыйыттан саҕалаан кэлэр сылга толору уонна аҥарыгар сурутуу хампаанньата саҕаламмыта. Онтон хаһан да буоларын курдук алтынньы ый ортотуттан уон хонук устата чэпчэтиилээх сурутуу буолла. Хаһыаппыт сыаната ааспыт сыллааҕар кыратык үрдээбит. Ол да буоллар убаастаабыллаах ааҕааччыларбыт онтон толлон турбакка бэйэлэрин улуустарын соҕотох хаһыатыгар сурутуохтара диэн эрэнэбит. Холобура, Аҕам саастаахтар декадаларын кэмигэр Эмис нэһилиэгин олохтооҕо Афанасий Бубякин 20 киһиэхэ сыл аҥарыгар улуус хаһыатын сурутан биэрэн биир дойдулаахтара махталларын тириэрдэллэр.
“Улууһум хаһыатыгар дьэ сурутаары сырыттахпына, Афанасий Афанасьевич суруттарда диэн этэн үөрдүм-көттүм. Киһиэхэ кыра да наада. Ордук сааһырбыт дьоҥҥо. Эдэр сылдьан улаханнык туохха да кыһаллыбат буоллаҕын. Улуус сонунун кэпсиир хаһыаппар онон олорон эрэ сурутан хаалбыппынан махталым улахан”, — диэн педагогическай үлэ бэтэрээнэ Алексей Гаврильев сылаас тылларын этэр.
Онтон биһигини куруутун өйүүр партнербут, меценат Руслан Федотов бу да сырыыга туора турбакка, 15 киһиэхэ толору сылга сурутан биэрдэ.
“Улуус хаһыата бу улуус сиэркилэтэ буоллаҕа дии. Аммаҕа кэлбит киһи “Амма олоҕо” хаһыаты ылан аахтаҕына, улуус туһунан элбэҕи билэр. Мин куруутун бэйэм эмиэ сурутан ааҕабын, хойутаан да кэллэҕинэ, суруллубута эргэрбэт. Дойдум дьоно улуускут хайыатын өйөөн, сурутан ааҕын диэн ыҥырабын”, — диэн Руслан Еремеевич санаатын тириэрдэр.
Биһиги өйүүр дьоммутугар дириҥ махталбытын тириэрдэбит уонна кэлэр сылга сурутуу ахсынньы 20 күнүгэр диэри ыытылларын санатан туран, улуускут хаһыатыгар сурутуоххут диэн эрэнэбит. Улуус хаһыаттаах буоларын туһугар бары биир санааланыаҕыҥ!
“Амма олоҕо” хаһыат