Балаҕан ыйа түмүктэнэрэ олох аҕыйах хонук хаалла. Ол эрээри күн-дьыл мэһэйдээн оттооһун өссө да сорох хаһаайыстыбаларга түмүктэнэ илик. Бэҕэһээҥҥи туругунан улуус окко былаанын 80,5 бырыһыан толордо. Бу ылыммыт соругу куоһарда.
Амма улууһун тыатын хаһаайыстыбата нэдиэлэҕэ иккитэ хомуйар субуоккатынан көрдөххө, балаҕан ыйын 23 күнүн туругунан улуус үрдүнэн 23290 тонна от оттонно. Ааспыт сыл бу кэмигэр 33894 тонна от кэбиһиллэн былаан 98 бырыһыан туолбута.
“Отчуттар сүрүннээн үлэлээн бүттүлэр. Онон субуокка хомуйуутун түмүктүүбүт. Мобильнай биригээдэлэр бу турбут кураан күннэри былдьаһан отторун эмиэ түмүктүөхтэрэ. Ол курдук кинилэр күүстэринэн 5830 тонна оттонуллан былааннарын 92 бырыһыан толордулар. Күн бүгүн Лукин аатынан уонна “Үрүйэ” хаһаайыстыбаларын биригээдэлэрэ оттуу сылдьаллар. Тэрээһиннээх хаһаайыстыбалар былааннарын 63,1, бааһынай хаһаайыстыбалар 90,7 чааһынайдар 82, 6 бырыһыан толордулар. Эбии аһылыкка былаан эмиэ туолан иһэр”, — диэн этэр улуус кылаабынай агронома Николай Гаврильев.
«Амма олоҕо» хаһыат