Амма улууһун тыатын хаһаайыстыбатын управлениета ылар дааннайынан балаҕан ыйын 5 күнүн туругунан улууска 21255 тонна от бэлэмнэниллэн былаан 73,5 бырыһыан туолла.
Тохтообокко, санаан кэлэ-кэлэ түһэр ардахтар оттооһун хаамыытыгар биллэн туран охсоллор. Ол эрээри сүөһү, сылгы кыстыгын бэлэмнии сылдьар хоһуун отчуттар кыралаан да буоллар, соруктаммыт былааны толорууга үлэлии-хамсыы сылдьаллар. Ол курдук күн бүгүн улуус үрдүнэн 23797 га сир охсуллунна, 21255 тонна от бэлэмнэниллиннэ. Бу былаан 73,5 бырыһыана. Санатан этэр буоллахха, быйылгы от хампаанньатыгар 28915 тонна от бэлэмнэниллиэхтээх. Балаҕан ыйын 5 күнүн туругунан тэрээһиннээх хаһаайыстыбалар былааннарын аҥарын толордулар. Ол эбэтэр 3850 тоннаны оттоотулар. Бааһынай хаһаайыстыбалар сезоннааҕы сорудахтарын толороллоро аҕыйах хаалла. Ол курдук 9298 тоннаны кэбиһэн былаан 84, 1 бырыһыаҥҥа тэҥнэстэ. Онтон чааһынайдар бары кэриэтэ оттоон бүтэн, былааннарын 79,3 бырыһыаҥҥа тириэртилэр, ол эбэтэр 8107 тоннаны оттоннулар.
“Амма олоҕо” хаһыат