Амма улууһун тыа хаһаайыстыбатын управлениетын салайааччыта Ион Кононов иһитиннэрбитинэн, от ыйын 29 күнүгэр улуус баһылыгын анал дьаһалынан оттооһуҥҥа ыксаллаах-быһыы майгы балаһыанньата биллэрилиннэ.
“Маннык быһаарыныы оттуур ходуһаларынан кэрийэн көрүү, хаһаайыстыбалары, биирдиилээн дьону кытта кэпсэтии түмүгүнэн ылылынна. Ол курдук Амма улууһа атын илин эҥэр улуустары кытта тэҥнээтэххэ саамай курааннаабыт улуус буоллубут. Бэс, от ыйдарыгар ардах үчүгэйдик түспэтэ. Инньэ гынан от тахсыыта олох мөлтөх. Күн бүгүҥҥү туругунан 28950 тонна былаантан баара эрэ 3775 тонна оттонон, былаан 15 бырыһыан эрэ туолан иһэр. Ордук Амма, Чапчылҕан, Бөтүҥ, Покровка, Амма Наахара, Чакыр, Болугур нэһилиэктэрэ курааннаатылар. Атын да нэһилиэктэргэ үүнүү олус үчүгэйэ суох. Ааспыт нэдиэлэ бүтэһик күннэригэр ходуһаларга сырыттыбыт. Манна Покровка нэһилиэгэр баар Петров Игорь Петровичка, Максимов Василий Дмитриевичка, Аммаҕа Анатолий Анатольевич Баишевка сырыттыбыт.
Кинилэр бэлиэтээбиттэринэн отун үүнүүтэ олох мөлтөх. Былырыыҥҥыга лаппа тиийбэт. Игорь Петрович Нам улууһуттан от атыылаһарга дуогабардаспыт. Атын сиргэ баран оттооһун туһунан эттэххэ, сорох отчуттарбыт Хаҥалас, Мэҥэ Хаҥалас улуустарыгар баран оттуурга кэпсэтиилэр бардылар. Чакырга баар “Кэскил” хаһаайыстыба сырыттым. Бэрэссэдээтэлэ Александр Кармановы уонна отчуттары кытта көрүстүм. Бу хаһаайыстыба былырыын 1000 тонна ылбыт ходуһатыттан 200 тоннаны эрэ ылар кыахтаах эбит. Салгыы Уус Майа сиригэр Нуотара үрэҕэр бардылар. Быйыл билэргит курдук өрүспүт уутун таһаарбакка, орто уу да кэлбэтэҕэ. Инньэ хочолоох нэһилиэктэрбитигэр от олох үүммэтэ. Онон үрэх сирдэргэ тахсан оттуурга мобильнай биригээдэлэр тэриллиннилэр.
Уопсайа 15 хаһаайыстыба мобильнай биригээдэлэрэ үрэхтэргэ тиийэн оттуу сылдьаллар. Бүгүҥҥү туругунан 536 тонна оту оттоотулар, ол эбэтэр былааннарыттан 8 бырыһыан. Бэйэбит суоттанарбытынан былаантан 75 бырыһыанын ылар соруктаахпыт. Ол курдук миэстэтигэр 15000 тоннаны, мобильнай биригээдэлэр 6000 тоннаны уонна 2000 тонна кур оппутун ааҕан туран 22000 тоннаттан тахса оттонон уонна эбии аһылыгы эбэн сыл тахсыахпыт диэн суоттанабыт. Быйыл сиилэскэ былаан 1900, сенаж 1300 тонна. Ону толоруохпут диэн соруктанабыт. Отчуттар туох баарынан, от кылгас да буоллаҕына барытын оттуу сылдьаллар. Бу чэппиэргэ, атырдьах ыйын 1 күнүгэр өрөспүүбүлүкэ тыатын хаһаайыстыбатын миниистирин солбуйааччы Сахаяна Афанасьевна Павлова, нэһилиэк баһылыктара эмиэ кыттыылаах оттооһуҥҥа мунньах ыытыахтыт”, — диэн Ион Семенович сырдатта.
“Амма олоҕо” хаһыат