Амма улууһа анал байыаннай дьайыыга сылдьар биир дойдулаахтарбытыгар бэйэтин көмөтүн ахсаабакка оҥорор. Бу күннэргэ дьаһалта кэрэ аҥардара идэһэттэн кэһии бэлэмнээн түбүгүрдүллэр.
“Биһиги дьаһалтабыт кэлэктиибин кэрэ аҥара бу курдук ас бэлэмнээн хаһыс да төгүлбүтүн субуотунньуктуубут. Баһыылкалар ахсынньы 5 күнүгэр барыахтаахтар. Бу сырыыга уолаттар саҥа дьылы көрсө бэйэлэрин дойдуларын аһын амсайдыннар диэн ыһаарыламмыт соболору уонна сибиэһэйдии тоҥмут полуфабрикаттары бэлэмнээтибит. Барытын ваакумнай упаковкалаатыбыт. Аһы астааһыҥҥа, ис буотараҕын сууйууга биһиэхэ Амма нэһилиэгин уһуйааннарын повардара күүс-көмө буолаллар. 4 убаһа буотараҕын ЕДДС салайааччыта, байыаннай дьайыы бэтэрээнэ Носов Дмитрий Арианович биэрдэ. Онон биһиги улуус дьаһалтатын аатыттан кинилэргэ улахан махталбытын тириэрдэбит. Астары баһыылка оҥорон бэлэмниир үлэбитигэр волонтердар, Амматааҕы лиссиэй 10 «А» үөрэнээччилэрэ күүс-көмө буолбуттарын бэлиэтиибит. Бу курдук бука бары түмсэн үлэлээтэхпитинэ үлэ кыайыылаах, таһаарыылаах буолар. Атын тэрилтэлэри эмиэ анал байыаннай дьайыыга уолаттаргытыгар саҥа дьыллааҕы кэһии барыытыгар кыттыһаргытыгар ыҥырабыт. Уолаттарбытыгар бэйэ аһа куруутун күндү уонна күүтүүлээх”, — этэр Амма улууһун дьаһалтатын персоналы кытта сулууспа салайааччыта Ньургуйаана Давыдова.
Бэйэ сириттэн кэлэр кэһии хаһан баҕарар күндү. Онон дойдуларын көмүскүү сылдьар биир дойдулаахтарбытыгар ахтылҕаннарын таһаарар кэһиилэргитин улуус дьаһалтатыгар ахсынньы 5 күнүгэр диэри тириэрдиэххитин сөп.
“Амма олоҕо” хаһыат