Амма Наахара нэһилиэгин дьаһалтатын дьиэтигэр айылҕаны харыстааһыҥҥа элбэх үлэни ыытар улуус, өрөспүүбүлүкэ уопсастыбаннай эколога Анна Шишигинаны кытта көрсүһүү истиҥ сыһыаҥҥа ааста.
Уопсастыбанньык Анна Шишигина Амма өрүс көмүскэлигэр сүрүннээн туох үлэ ыытыллыбытын, олохтоох дьон тугу туруорсубуттарын сырдатта. Уопсастыбанньыктар Афанасий Алексеев, Баһылай Харысхал, Айыл Дьулурҕа, Степан Сутаков, Степан Нестеров, Владислав Коротов үгүс үлэни ыыппыттарын бэлиэтээтэ. Көрсүһүүгэ кэлбит дьон Анна Зиновьевнаттан, баһылыкпыт Захар Александровтан Амма өрүс дьылҕатын, олохтоохторго Амма өрүс ураты харыстанар айылҕа территориятын статуһун (ООПТ) ылар түгэнигэр үчүгэй да өрүтүн, атын ханнык хааччахтаах буоларын, Таҥхаҕа, Чыамайыкыга сир баайын көрдөөһүҥҥэ туох үлэлэр бара туралларын чуолкайдастылар уонна онно эппиэттэри иһиттилэр. Өнньүөстэр бэрт сэргэхтик олороҕут, саҥа тутуу, дьиэлэр бөҕө бааллар, тутуллаллар эбит диэн ыалдьыппыт санаатын үллэһиннэ. Уулуссаҕа оҕо саҥата, киэһэ аайы футбол тэбэн оонньуулларын сэҥээрдибит диир. Экология иитиитигэр, хамсааһыннарга нэһилиэк өрүү инники, активнай позициялааххыт диэн хайҕаата. Кэлбит дьон Аммаҕа туристар сылдьыыларыгар бэрээдэктээһини олохтооһун долгутарын тула элбэх боппуруостары биэрдилэр. Түмүккэ Анна Зиновьевна айылҕаны харыстааччылар социальнай ситимҥэ туспа бөлөхтөөхтөрүн, онно элбэх улуустан уопсастыбанньыктар баалларын, тустаах эппиэттээх дьоннор да баалларын, онон онно киирэн сөптөөх эппиэттэри ылыаххытын сөп диэн диэн туран, ол бөлөххө киирэргэ ыҥырда.
Ирина КОРЯКИНА-ОЛЕСОВА