Тымныы, ардах аргыстаах тыаллаах күнү аахсыбакка, Эмис нэһилиэгин Ураһалаах алааһыгар сылаас, истиҥ көрсүһүү буолан ааста. Улуу Кыайыы 80 сылын көрсө 30-с сыллартан саҕалаан сэрии аас-туор сылларыгар тигинэччи үлэлээн олорбут “II Пятилетка” колхуос ыччаттара өйдөбүнньүк мэҥэ бэлиэни туруоран, ахтан-санаан ааһар долгутуулаах түгэннэрэ буолла.
Бэлиэ тэрээһиҥҥэ уопсайа 40-тан тахса киһи ыраахтан-чугастан кэлэн кытыннылар. Тэрээһини бэтэрээн педагогтар Ольга Михайлова уонна Алексей Гаврильев иилээн-саҕалаан ыыттылар. Ытык ыалдьыттарынан колхуос чилиэннэрин ыччаттара буолан, билигин төһө да сааһыран тайах үрдүгэр сырытталлар, дьоннорун сырдык ааттарын үйэтитии тэрээһинигэр кытыннылар. Манна улуус салалтатын аатыттан бэтэрээннэр Сэбиэттэрин бэрэссэдээтэлэ, бэйэтэ өр сыл Эмис нэһилиэгин салайбыт Мария Захарова үйэлээх өйдөбүнньүгү оҥорууну тэрийсибит, салайсыбыт Алексей Гаврильевка, Станислав Николаевка, Василий Соловьевка, Октябрина Гаврильеваҕа улуус баһылыга Степан Кузьмин Махтал суруктарын туттарда.
“Биһиги “II Пятилетка” колхоз ыччаттара буолабыт. Сэрии ыар сылларыгар ийэлэрбит, аҕаларбыт, эһэлэрбит, эбэлэрбит күүстээх санааларынан, биир сомоҕо түмсүүлээх этилэр. О түмүгэр, ону тэҥэ бэрэссэдээтэллэрэ Захаров Петр Андреевич дьоҥҥо үчүгэй сыһыанынан, мындыр толкуйунан биир да холхуостаах, оҕо -уруу, сэрии тулаайахтара хоргуйууну ааһан, биир да киһи энчирээбэккэ, Улуу Кыайыыны көрсүбүттэрэ. Ол махталын ыччаттара, 85 сыл буолан баран өйдөбүнньүк бэлиэ туруордубут. Бу бэлиэни кэлэр кэнчээри ыччат көрөн-истэн, тохтоон сүгүрүйэн аастын диэн баҕа санаалаахпыт”, — диэн Станислав Николаев санаатын этэр.
«II Пятилетка» холхуос бэрэссэдээтэлэ Петр Андреевич Захаров сиэннэрэ, аймахтара
Түмүккэ аны үс сылынан кэлэн аһарга диэн тэрээһин кыттыылаахтара бары илии баттаан, ким бэлиэ туруутугар кылаатын киллэрбитин суруйан, кэлэн кыттыбытын кэрэһэлээн капсулаҕа уктулар. Капсуланы оччотооҕу колхуос бэрэссэдээтэлэ Петр Андреевич Захаров сиэнэ Петр Ильич Захаров кыттыылаах алааска көмтүлэр. Маны сэргэ Ураһалаах алаас түмсүүтэ тэриллэн, уопсай мунньах быһаарыытынан салайааччынан Петр Константинов биир санаанан талылынна.
“Бу курдук Улуу Кыайыы 80 сылын көрсө Эмис нэһилиэгин олохтоохторо, Ураһалаах алаастан силистээх-мутуктаах, “II Пятилетка” холхуос чилиэннэрин ыччаттара олус махталлаах үлэни оҥордулар. Кинилэр бары түмсэн, сүбэлэһэн холхуос дьонугар-сэргэтигэр уонна кини мындыр бэрэссэдээтэлигэр Петр Андреевич Захаровка анаан өйдөбүнньүк бэлиэни холхуос үлэлээн ааспыт Ураһалаах алааһыгар туруорбуттара хайҕаллаах уонна махталлаах. Бу курдук көлүөнэттэн көлүөнэҕэ бэриллэн, биһиги Кыайыыны уһансыбыт дьоммутун хаһан да умнуо суохтаахпыт, кинилэр үтүө ааттарыгар сүгүрүйэ туруохтаахпыт”, — диэн этэр Мария Романовна.
Бэлиэни аҕалан туруорууга Алексей Ильич Гаврильев, Алексей Дмитриевич Захаров, Тимофей Петрович Захаров, Степан Петрович Новиков, Кузьма Еремеевич Новиков, Валентин Павлович Николаев үлэлээтилэр. Кинилэри нэһилиэк салалтатын аатыттан дьаһалта сүрүннүүр исписэлииһэ Нонна Ноговицына эҕэрдэлээтэ, Махтал суруктарынан наҕараадалаата. Онтон Захаров Петр Андреевич аймахтарын аатыттан Алтан нэһилиэгиттэн кэлбит Мария Неустроева бэлиэни оҥорууга үлэлээбит дьоҥҥо эмиэ Махтал суруктарын туттарда.
Ити курдук чуумпуран турбут Ураһалаах алаас урукку кэмин санатан дьон-сэргэ саҥатынан туолла. Тымныы күһүҥҥү күн мустубут дьон сылаас эйгэтинэн хайдах эрэ сымнаабыкка дылы буолла.
“Амма олоҕо” хаһыат