Бөтүҥ орто оскуолатыгар сыл бастакы тэрээһининэн «Устудьуон доҕоруом, кэпсэтиэх» диэн үгэскэ кубулуйбут профориентационнай көрсүһүү буолла. Устудьуон оҕолор куорсун анньыммыт оскуолаларын ахтан, үөрэ-көтө кэпсэтэн, санааларын үллэстэн, устудьуон олоҕун билиһиннэрдилэр, үөрэнэр кыһаларын үөрэнээччилэргэ сырдаттылар.
ХИФУ ИЯКН саха факультетын 1 курс студена Айта Иванова «Оскуола саҕаттан бэйэҕитин көрүнэ үөрэниҥ, самодисциплиналаах буола улаатыҥ. Уруоктарга хойутаамаҥ, таҥаһы-сабы көрүнэн, ас астана үөрэниҥ. Ол барыта көмөлөөх буолар» -диэн сүбэлээтэ. ДВФУ 1 курсун студена Стручков Оскар «Үөрэххэ киирии биир кэлим экзаментан олус тутулуктаах. Өскөтүн эн аттестат ылар экзээмэҥҥэ 9 кылааска ыарырҕаппыт буоллаххына, толкуйданыаххын наада биир кэлим экзээмэн өссө ыарахан. Онон сылгын сүтэрбэккэ дьонуҥ өйүүр буоллахтарына орто үөрэххэ киирэ турбутуҥ ордук. Син биир кыра баалга туттаран, орто үөрэххэ барар курдук буолаҕын. Онон, оҕолоор, эрдэттэн толкуйданан көрүҥ, кыайар буоллаххына баһаалыста күүскэ дьарыктанан сөбүлээбит үрдүк үөрэх кыһатыгар баалга үлэлээн киириҥ»-диэн сүбэлээтэ. Гоголева Рада «ХИФУ омук тылын салаатыгар 1 курска үөрэнэбин. Оҕолоор, нуучча тылын үчүгэйдик үөрэтиҥ. Мин факутельтеппар тас дойдуттан преподователлэр үөрэтэллэр. Уруоктар бары нууччалыы тылынан үөрэтэллэр». Дьэ, уонна сессия, пара, зачетка туһунан бэрт элбэҕи сырдаттылар. Ол кэннэ оскуолабыт дириэктэрэ Акулина Иванова 4 хамаандаҕа арааран нэһилиэкпит, улууспут, Саха сирин туһунан «Брейн-ринг» оонньотто. Түмүккэ, үҥкүүлээн, хаартыскаҕа түһэн тарҕастыбыт.
Оҕолорбут этэҥҥэ талан ылбыт идэлэригэр кыһанан үөрэнэн дойдуга туһалаах дьон буоллуннар диэн ис сүрэхтэн алҕыыбыт.
Мария Иванова.