Дьокуускай куоракка Е. Ярославскай аатынан кыраайы үөрэтэр түмэлгэ норуот тапталлаах ырыаһыта Валерий Ноев төрөөбүтэ 85 сылыгар анаммыт, кини олоҕун, айар үлэтин кэпсиир «Сүрэхпит умнуон баҕарбат… » диэн интэриэһинэй быыстапка арыллан үгүс дьон болҕомтотун тарта. Арассыыйаҕа биллэриллибит Дьиэ кэргэн сылын кытта сибээстээн быыстапкаҕа мелодист дьиэ кэргэнигэр, кини төрүччүтүгэр ураты болҕомто уурулунна.
Дьон-сэргэ күн бүгүнүгэр диэри уоһуттан түһэрбэккэ ыллыы сылдьар, киһи сүрэҕэр сүппэттик иҥэн хаалбыт ырыалары айбыт, чахчы да норуот мелодиһа Валерий Ноев билигин баара буоллар 85 сааһын томточчу туолуо этэ. Бу үбүлүөйдээх бэлиэ датаҕа кини аатын үйэтитиигэ, кэлэр кэнчээри ыччакка хаалларыыга өрөспүүбүлүкэҕэ үгүс элбэх тэрээһиннэр ыытылыннылар. Онтон биирдэстэринэн киниэхэ анаммыт «Сүрэхпит умнуон баҕарбат…» диэн быыстапка буолла. Бу быыстапканы мелодист биир дойдулаахтара, аймахтара көҕүлээн, тэрийэн туруордулар. Ол курдук аймаҕа Саргылана Адамова-Алтан Кыыс, төрөппүт кыыһа Анастасия Чирикова, уола Валерий Ноев, музыка уонна фольклор түмэлин, Мэҥэ Хаҥалас улууһун Сыымах нэһилиэгин түмэлин, Ярославскай аатынан кыраайы үөрэтэр түмэл фондаларыттан, Санниковтар дьиэ кэргэттэрэ эмиэ харайа сылдьар малларыттан олус сэдэх, норуокка биллэ илик экспонаттар бааллар.
“Бу быыстапкабыт Арассыыйаҕа биллэриллибит Дьиэ кэргэн сылыгар анаммыта. Ол иһин Ноевтар аймах хантан баар буолбуттарын билиһиннэрэр, Валерий Власьевич силиһин-мутугун арыйар генеологическай таблица аҕа уустарынан толору турда. Хаһан да урут көрдөрүллүбэтэх сэдэх докумуоннар бааллар. Ол курдук кини төрөөбүт сибидиэтилистибэтиттэн саҕалаан, бу олохтон барара биир ый иннинэ соҕурууттан экспертэр кини “Күөрэгэй” уонна “Кыракый кыысчааным”диэн ырыатыгар ыыппыт сибидиэтилистибэлэригэр тиийэ. “Аҥардас күөрэгэйгэ анаммыт ырыам сэттэ” диэн кини бэйэтин илиитинэн суруйбут суруга баар. Онтон биһиги билэрбит икки ырыа. Онтон атынын өссө билбэппит. Маны таһынан Валерий Ноев кэргэнигэр Дора Игнатьевна Санниковаҕа анаммыт матырыйааллар турдулар. Манна Дора Игнатьевна ытарҕата, сүүрүүгэ чемпионнаан кэппит лиэнтэтэ уонна да атын экспонаттар бааллар. Быыстапкаҕа биһиги Валерий Власьевыһы өссө учуутал быһыытынан арыйа сатаатыбыт. Ол курдук манна оҕолор бэлэхтээбит открыткалара, ыыппыт уруогун ырыппыт тэтэрээтэ болҕомтону тардыахтара.
Эмиэ аан бастакытын араас кэмнэргэ ырыа күрэхтэригэр Гран при буолбут ырыаһыттар мэтириэттэрэ, ырыа айааччылар таҕыстылар. Аны манна биир интэриэһинэйэ Валерий Ноев ырыаларыгар анаммыт плакаттар буолуохтара. Бу плакаттарга хас биирдиилэригэр куйаар кодтаах. Ол коду холбоотоххо кини ырыаларын истиэххэ сөп. Өссө быыстапкаҕа кэлбит дьон Сунтаартан Николай Семенович Кондратьев диэн баяны, аккардеону кэллиэксийэлиир киһи кэллиэксийэтин сорох чааһа турбутун бэркэ сэргии көрүөхтэрэ. Итинник кэпсээтэххэ элбэх. Онон быыстапканы кэлэн көрүөххэ наада. Бу быыстапка Емельян Ярославскай аатынан кыраайы үөрэтэр түмэлгэ ахсынньы 10 күнүгэр эрэ диэри турар. Онон бу күҥҥэ диэри кэлэн көрөргүтүгэр ыҥырабыт. Тапталлаах ырыаһыппыт туһунан өссө элбэҕи билиэххит, сэргиэххит, сөҕөн-махтайан барыаххыт диэн эрэнэбит”, — диэн РФ театральнай деятеллэрин сойууһун уонна СӨ деятеллэрин бырабылыанньатын чилиэнэ Саргылана Адамова- Алтан Кыыс быыстапка туһунан санаатын үллэһиннэ.
Быыстапканы үөрүүлээхтик арыйар аалай лиэнтэни Валерий Ноев төрөппүт кыыһа Анастасия Чирикова, сиэн быраата Никита Ноев уонна СӨ мелодистарын сойууһун бэрэссэдээтэ Алексей Егоров быстылар. Валерий Ноев талааныгар сүгүрүйээччилэр кэлэн эҕэрдэ тылларын тириэртилэр, санааларын атастастылар. Амма улууһун аатыттан эҕэрдэ тылын улуус баһылыгын социальнай боппуруостарга солбуйааччы Ньургуйаана Илларионова эттэ.
Күндү биир дойдулаахтарбытын, тапталлаах мелодиспыт сүгүрүйээччилэрин олус интэриэһинэй быыстапканы ахсынньы 10 күнүгэр диэри баран көрөргүтүгэр ыҥырабыт.
“Амма олоҕо” хаһыат