Амма улууһун ветераннара кыһыҥҥы өрөбүллэрин көхтөөхтүк, туһалаахтык атаардылар. Оҕо спортивнай оскуолатын саалатыгар волейболга күрэхтэһэннэр бастыҥы быһаарыстылар.
Кыра нэһилиэнньэлээх нэһилиэктэр көрдөһүүлэринэн күрэх “Сахавабол” быраабылатынан барда, ол эбэтэр сүрүн 4 киһи оонньуур уонна солбукка 1 киһи хамаандаҕа киирэр. Эр дьон уонна дьахталлар хамаандалара холбоһон оонньоотулар.
Түмүккэ Бөтүҥ ветераннарын хамаандата 1 миэстэ, 2 миэстэ — Болугур, 3 миэстэ — Соморсун буоллулар.
Маны тэҥэ тэрээһин саамай долгутуулаах түгэнинэн быйыл улууска ыытыллыбыт спартакиада түмүгүн иһитиннэрии буолла. Санатар буоллахха, ветераннар дуобакка, саахымакка, остуол тенниһигэр, буулдьанан ытыыга, хабылыкка, хаамыскаҕа уонна волейболга кытаанах киирсиилэри көрдөрбүттэрэ. Уопсай түмүккэ 1 миэстэни Бөтүҥ, 2 миэстэни Амма, 3 миэстэни Соморсун хамаандалара ыллылар.
—Улуус таһымнаах күрэҕи ыытарга элбэх сүүрүү-көтүү, кэпсэтии, тэрээһин ирдэнэр. Маныаха быйыл биһиэхэ күүс-көмө буолбут Дмитрий Неустроев дириэктэрдээх оҕо спортивнай оскуолатын, Николай Ларионов дириэктэрдээх Амма 1№- дээх орто оскуолатын коллективтарыгар спартакиадабытын үрдүк таһымҥа ыытарга көмөлөрүн иһин улахан махталбытын тиэрдэбит,- диэн улуус ветераннарын Сэбиэтин бэрэссэдээтэлэ Мария Захарова хаһыат нөҥүө тиэрдэр.
“Амма олоҕо” хаһыат.