Амма улууһугар улуус хочуолунайдара быйыл хаһааҥҥытааҕар да эрдэ унаар буруоларын унаарыттылар. Ол курдук балаҕан ыйын 6 күнүттэн дьиэлэргэ сылаас кэлэн дьон соһуйа үөрбүттэрэ. Амматааҕы ОДьКХ дириэктэрэ Виктор Кузнецовка «Кыстыкка хайдах-туох киирэн эрэҕит, кэпсээн эрэ” диэбитинэн киирэ сырыттыбыт.
Маныха дириэктэр хоруйа муос-таас курдук бигэ, холку буолан биэрдэ. «Сылааһы балаҕан ыйын 6 күнүгэр киэһэ биэрбиппит. Билиҥҥитэ этэҥҥэбит, кыстыкка бэлэммит». Ити курдук кыстыкка бэлэмнэнэр үлэ устар сайыны быһа барбыт. Үлүгэрдээх улахан өрөмүөн үлэтин үмүрүтэн эрэллэр эбит. Быйыл абырахтыыр-самыыр, сыбыыр-тарыыр үлэҕэ 15 мөлүйүөн солкуобай көрүллүбүтүн үрдүнэн, эбии үп көрдөөн ылбыттар. Барыта холбоон, 36 мөлүйүөн сууммаҕа 28 эбийиэккэ 38 үлэ араас көрүҥүн оҥорбуттар. Сорох хочуолунайдарга хочуолларын өрөмүөннээн ситэ бүтэ иликтэр эрээри, «Алтынньыга диэри үлэни барытын саба тутуохпут», — диир дириэктэр.
Чоххо улахан тутайыы суохха дылы. Улахан тымныы түһүөр диэри оттон эрэр чох хаһааһа баар. Сааскы навигациянан кэлбит уонна былырыыҥҥы кур чоҕу кытары мунньан-тараан 24 тыһыынча туонна улууска баар. Эбии, суол турдар эрэ, Сангаартан уонна Харбалаахтан тиэйэн саҕалыахтаахтар.
“Кыстыгы туоруурбутугар 84 тыһ. туонна ирдэнэр”, — диэн суоттаан таһаарда Виктор Иннокентьевич.
«Сүрэхпит сылааһа — дьоммутугар» диэн девиһинэн үлэлиир коммунальнай хаһаайыстыба үлэһиттэрэ саҕаламмыт уһун кыстыгы саахала суох туораан, бука бары сылааска олоруоҕуҥ.
Олег ЕГОРОВ