Балаҕан ыйын бүтэһик күннэригэр ыытыллыбыт “Бэчээт тиэргэнэ-2024” Уһук Илин кинигэ быыстапка-дьаарбаҥкатыгар СӨ Национальнай бибилэтиэкэ ситиһиилээхтик кытынна. Биир дойдулаахпыт этнограф Владимир Васильев научнай экспедициятын туһунан сырдатар кинигэ быыстапка сэҥээриитин ылла.
“Биһиги улуус Олоҥхо ыһыаҕын көрсө уон кинигэни таһаарбыппыт. Ол иһигэр “Научные труды и экспедиционная деятельность” диэн кинигэбит “Бэчээт тиэргэнэ-2024” быыстапка-дьаарбаҥкаҕа “Бастыҥ научнай кинигэ” аатын ылла.
Бу кинигэни Национальнай бибилэтиэкэни кытта сүбэбитин холбоон оҥорбуппут. Манна редакционнай кэллиэгэийэҕэ оҕо искусствотын дьиэтин преподавателэ Виктория Георгиевна Григорьева үлэлэспитэ. Онтон хомуйан оҥорооччу эмиэ биир дойдулаахпыт Артем Николаевич Ефремов буолар. Ону сэргэ историческай билим доктора Екатерина Назаровна Романова улахан көмөнү оҥорбута. Онон бу олус үөрүүлээх сонуну истэн астынныбыт уонна манна үлэлэспит дьону истиҥник эҕэрдэлиибит”, — диэн Амма улууһун социальнай боппуруостарга солбуйааччыта Ньургуйаана Илларионова сырдатта.
«Амма олоҕо» хаһыат