Сатаҕай нэһилиэгэр С.Д. Давыдов аатынан спортивнай саалаҕа Арассыыйаҕа Дьиэ кэргэн сылыгар аналлаах оскуола оҕолоро уонна төрөппүттэр кыттыылаах волейбол күрэҕэ бэрт сытыытык буолан ааста.
Күрэхтэһиигэ оҕолор төрөппүттэрин кытта бэркэ астынан оонньоотулар. Быйылгы үөрэх сылыгар нэһилиэккэ бастакы улахан күрэх тэрийээччилэри, волейбол сүгүрүйээччилэрин бииргэ түмтэ. Саала иһэ толору көрөөччүлээх бэрт сэргэх тэрээһин буолан, нэһилиэнньэ сэргэхсийдэ.
Оонньуулар ахсаанын 15 очукуоҕа диэри кылгатан, хамаандалары икки бөлөххө арааран ыыттыллыннылар. Ол курдук 5-8 кылааска диэри бастакы бөлөххө үс хамаанда, 9-11 кылаастарга эмиэ үс хамаанда буолан күөн көрүстүлэр. Састаапка үс оҕо, үс төрөппүт оонньоотулар. Бэрт ыһыылаах-хаһыылаах күрэх буолла. Соһуччу кыайыылар ыалдьааччылары үөртүлэр даҕаны, соһуттулар да диэххэ сөп. Төрөппүттэр урукку оонньуур үөрүйэхтэрин бу кэмҥэ даҕаны тута сылдьаллара көрөөччүлэри, оҕолору даҕаны астыннарда, сөхтөрдө. Араас приемнары, быһыылары, кыра сөҕүмэр түгэннэри Гаврил Орлов бэркэ комментарийдаан ыытта.
Тыҥааһыннаах күрэхтэһии түмүгүнэн бастакы бөлөххө бастакы миэстэ 5-6 кылаас, иккис миэстэ 7 кылаас уонна үһүс миэстэ 8 кылаас буолла. Иккис бөлөххө кыайыылааҕынан 10 кылаастар, иккис миэстэҕэ 11 кылаастар уонна үһүс миэстэҕэ 9 кылаастар таҕыстылар. Маны сэргэ анал бириистэр туттарылыннылар. Ол курдук “Бастыҥ оонньооччу” анал ааты Андриан Андреев (7 кылаас), Любомир Лукин (10 кылаас), төрөппүттэр Ариан Яковлев, Владимир Адамов, “Бастыҥ ыалдьааччылар” диэн анал ааты 5-6, 8, 10 кылаас оҕолоро ыллылар. Волейбол курдук спорт саамай кыраһыабай оонньуутун таптаан дьарыктанар кэнчээри ыччаттарбытыгар салгыы күүстээх, утумнаах дьарыгы баҕарабыт. Төрөппүттэрбит тэтимнэрин ыһыктыбакка, салгыы дьарыктанан, чөл олоххо угуйа, холобур буола сылдьалларыгар баҕабытын этэбит.
Христина СКРЯБИНА