Амматааҕы “Сардаана” оҕо сайдар киинэ саҥа үөрэх сылын ситиһии көтөллөөх көрсөр. «Тыа сирин бастыҥ уһуйаана-2024» үрдүк ааты уһуйаан бэйэтин оҕону иитиигэ киллэрэр саҥа бырайыактарынан ылан улуустарын киэҥ сиргэ ааттаттылар.
Биһиги «Сардаанабыт» быйыл 50 сааһын туолар өрөгөйдөөх үбүлүөйүгэр бэлэмнэнэр. Уһуйааммыт кырачааннар тыллара-өстөрө тупсарыгар, оҕолор саҥалара-иҥэлэрэ сайдарыгар ураты болҕомтону уурар. Түргэн, тэтимнээх олоҕу кытта тэҥҥэ хардыылаан араас саҥа соруктары, сыаллары толорор, олоххо киллэрэр. Быйыл Дойдуга Дьиэ кэргэн, улууспутугар Оҕо саас, Аммаҕа Олоҥхо сыллара биллэриллибиттэрин чэрчитинэн биһиги уһуйааммыт Лилия Витальевна Степанова салайар кэлэктиибэ бары тэрээһиннэргэ көхтөөхтүк кыттан, ону таһынан, быйыл бэлиэтэнэр үйэ аҥардаах үбүлүөйүгэр бэлэмнэнэн, үлэ тэтимин өссө күүһүрдэн, кырачаан иитиллээччилэрбит кэлэр кэскиллэрин уһуйсан араас таһымнаах куонкурустарга кыттыыны ылабыт. Оҕону күннэтэ сайыннарар араас ньымалары тобулан үлэбитигэр киллэрэн ханыылаан туттабыт. Ол курдук, саха оҕото бэйэтин төрүт эйгэтигэр, өбүгэ үгэһин билэ-көрө улаатыахтаах, сатабылын иҥэриниэхтээх диэн санааны тымтык оҥостон, кэлэктиип уонна төрөппүттэр көмөлөрүнэн дьоҕус музей-балаҕан тэриллэн үлэҕэ киирдэ. Музейбыт ис-тас бараана уу сахалыы тыыннанна, араас дидактическай оонньууларынан, экспонаттарынан барыта оҕо тутан-хабан, сыныйан көрө сайдар эйгэтигэр туһуланна. Маны таһынан оҕону кыра сааһыттан дойдутун таптыыр өйгө-санааҕа, тыыҥҥа иитэбит.
Амматааҕы «Сардаана» оҕону сайыннарар кииҥҥэ оҕону кыра эрдэҕиттэн сэрэхтээх, сатаан көмүскэнэр кыахтаах буола улаатарыгар араас хайысхалаах үлэлэр ыытыллаллар. Уһуйааҥҥа сэрэхтээх буолууга интэриэһинэй темалары тобулан, араас ньымалары туттан, интерактивнай оонньуулары оҥорон, иитэр-үѳрэтэр кэпсээннэри, оҕо болҕомтотун тардар ойуулуктары, оҕо билиитин хаҥатар үлэ тэтэрээттэрин оҥорон оҕо интэриэһин көбүтэр, билиигэ баҕаларын сайыннарар методическай көмө матырыйаал аттарыллан түмүллэн оҥоһуллубута. Оҕо сайдар киинигэр оҕону араас дьарыкка үөрэтэбит, сайыннарабыт. Кини холугар сөптөөх кыра үлэ көрүҥнэрин ситимин быспакка үөрэтэбит, үлэлэтэбит. Тыа сирин оҕото сиргэ чугас буолуохтаах, онно сыhыаннаах билиини, сатабыллары, үөрүйэхтэри кыра сааhыттан иҥэриниэхтээх диэн санааттан экологическай хабааннаах үлэҕэ иитиини, үөрэтиини туттабыт.
Үлэбит үтүө түмүктэрин эттэххэ, олунньу ыйга бүтүн Арассыыйатааҕы «Детский сад года” аһаҕас күрэх уонна ыам ыйыгар “Лучшие детские сады России 2024” күрэхтэр кыайыылааҕа буолбуппут. СӨ Үөрэҕин уонна наукатын министиэристибэтэ Оҕо саас сылыгар туһуламмыт айымньылаахтык үлэлиир уһуйааннар кэлэктииптэрин быһаарар уонна көҕүлүүр инниттэн, оскуола иннинээҕи үөрэхтээһин тиһигэр, ситиһиилээхтик үлэлиир инновационнай уопуту тарҕатар педагогтар үлэлэрин таһымын үрдэтэр сыалтан, сыл аайы ыытыллар «Тыа сирин бастыҥ уһуйаана-2024» кэтэхтэн куонкуруска 30 уһуйаан кыттыбытыттан «Лучшая организация работы по внедрению Федеральной образовательной программы дошкольного образования» диэн анал ааты ылан турабыт. Бу үрдүк ситиһиибитин уһуйаан үлэһиттэрин күнүгэр балаҕан ыйын 27 күнүгэр үөрүүлээх быһыыга-майгыга туттардылар. Иитэччилэр оҕону сайыннарар үлэбитин салҕыытынан быйыл Мэҥэ-Ханалас улууһугар , Майа сэлиэнньэтигэр ыытыллыбыт өрөспүүбүлүкэтээҕи үөрэх XX дьаарбаҥкатыгар иитээччилэр хамаанданан «Лучший образ» күрэххэ 2 үрдэл, диплом МАН РС(Я) “Көмүскэнэ, харыстана үөрэн (5-7 саастаах оҕолорго күннээҕи олоххо сэрэхтээх буолуу үөрүйэхтэрин билиһиннэриигэ уонна үөрэтиигэ иитээччигэ көмө)”, “Байанайдаах булчут” үлэлэрэ 1 үрдэллэри, “Уус тыл ситимэ”бырайыагынан — 2 үрдэли, оскуолаҕа киириэн иннинээҕи саастаах оҕолору үөрэхтээһин уонна алын сүһүөх кылаас педагогтарыгар анаммыт “Олоҥхолоох холбука” күрэххэ 2 үрдэл, сыыппара эйгэтигэр иитээччилэр, уһуйааччылар өрөспүүбүлүкэтээҕи «Лучший цифровой практик ДО” күрэххэ “Творческий подход” анал аат кыайыылаахтара буолан, ситиһэн үөрүүбүт үгүс, арыйар аартыктарбыт өссө арыллан, хаҥаан иһэллэригэр салгыы кэскиллээхтик үлэлиибит.
Наталья КОНОНОВА, Анастасия ЕГОРОВА