Амма улууһун култуураҕа уонна норуот айымньытыгар салаата Олоҥхо дэкээдэтин чэрчитинэн Амма нэһилиэгин тэрилтэлэригэр үлэлиир эдэр ыччаттарын ортотугар “Өркөн өй” күрэҕин ыытта. Күрэх “Аммабытыгар Олоҥхо ыһыаҕа” диэн тиэмэҕэ ананна. Дьэ кимнээх бу өй тургутуутугар кыайыылаах таҕыстылар?
“Күрэхпитигэр уопсайа биэс хамаанда кытынна. Ол курдук Амма 1-кы нүөмэрдээх оскуолатын, Амматааҕы кииннэммит балыыһа, Оҕо искусствотын оскуолатын, Федот Потапов аатынан норуот айымньытын дьиэтин уонна улуус дьаһалтатын эдэр үлэһиттэрин хамаандалара күөн көрүстүлэр. Күрэхпит хас да түһүмэх ыйыыталартан турда. Боппуруостар сүрүннээн быйыл сайын Аммабытыгар ыытыллыбыт өрөспүүбүлүкэтээҕи Олоҥхо ыһыаҕар туһуланна. Холобура хаартыскаҕа ким кистэммитин таайаллар, Аал луук мас туһунан уонна да атын ыһыахха сыһыаннаах боппуруостары бэлэмнээбиппит. Ыччаттар олус көхтөөхтүк кыттан билиилэрэ чиҥин көрдөрдүлэр. Бары да ааспыт ыһыахпын өссө төгүл санаан ыллыбыт. Түмүккэ элбэх баалы ылан, атыттартан чорбойон Амма 1-кы нүөмэрдээх оскуолатын хамаандата таҕыста.
Иккис миэстэни норуот айымньытын дьиэтин уонна үһүс миэстэ улуус дьаһалтатын хамаандалара таҕыстылар. Кыттыыны ылбыт бары эдэр ыччаттарга инникитин да маннык көхтөөх буолалларыгар баҕарабыт. Инникитин маннык форматтаах тэрээһиннэри өссө ыытыахпыт, ыччаттары көхтөөх буоларга ыҥырабыт”, — диэн улуус култуураҕа уонна норуот айымньытыгар салаатын исписэлииһэ Зоя Пахомова сырдатта.
“Амма олоҕо” хаһыат