Олунньу 14 күнүгэр Амма улууһун үөрэҕин үлэһиттэрин идэлээх сойуустарын улуустааҕы кэмитиэтин саҥа састаабын тэрээһин мунньаҕа буолла.
Мунньахха ааспыт сыллааҕы сметаны толоруу отчуотун улуус кэмитиэтин сүрүн бухгалтера Мария Филипповна Кузнецова бэрэсэдээтэллэргэ тиийимтиэ гына слайд нөҥүө билиһиннэрдэ уонна саҥа 2025 сыллааҕы смета былаанын иһитиннэрдэ. Кэмитиэт сметаны биир санаанан бигэргэттэ. Иккис боппуруоһунан улуус кэмитиэтин бэрэссэдээтилин солбуйааччытын талыы буолла. Манна кыттыылаахтар Амма улууһун үөрэхтээһинин салалтатын биир идэлээхтэр бастакы сүһүөх тэрилтэлэрин бэрэсэдээтэлин Белла Спартаковна Петрованы биир санаанан таллылар. Үлэ баарын тухары саҥаттан саҥа сүүрээннэр киирэллэр. Бу күн тэрилтэ бэрэсэтээллэрин сэттэ салааҕа арааран үлэ кыахтаахтык ыытылларыгар саҥа хамыыһыйалар тэрилиннилэр. Холобур Наталья Аргунова, Виталий Яковлев, Наталья Матвеева, Мария Жиркова, Евдокия Слепцова састааптаах үлэ боппуруостарыгар, үлэ сыһыаннаһыыларыгар хамыыһыйатын Белла Петрова салайыаҕа. Анна Ильина, Зоя Николаева, Василина Ильина, Татьяна Неустроева, Галина Стручкова састааптаах үлэ көмүскэлин боппуруостарыгар хамыыһыйаны Егор Баттахов сүрүннүөҕэ. Ньургуйаана Стручкова, Ньургуяна Ксенофонтова, Юлия Михайлова, Айталина Артемьева, Анна Еремеева састааптаах атын тэрилтэлэри кытта сыһыаннаһыыларга, ис тэрийэр үлэлэри сүрүннүүр хамыыһыйаны Вероника Николаева салайыаҕа. Дмитрий Саввинов, Сахаяна Харитонова, Елена Петрова, Николай Захаров, Наталья Арылахова састааптаах үлэһиттэри түмэр, араас култуурунай тэрээһиннэри тэрийэр салааны Оксана Криговорницына көҕүлүөҕэ. Эт-хаан чэбдигириитин, араас спортивнай тэрээһиннэри, доруобуйаны бөҕөргөтүү үлэлэрин Тихон Матвеев, Дария Иванова, Александр Неустроев, Степан Сутаков састааптаах хамыыһыйа үлэтин Василий Иванов сүрүннүөҕэ. Онтон үлэни сырдатыы хайысхатыгар Ирина Олесова, Розалия Винокурова, Ефросинья Пахомова, Ирина Тышканбаева уонна кинилэри салайар Антонина Слепцова киирдилэр. Ыччаты кытта үлэ хамыыһыйатын Розалия Павлова сүрүннүөҕэ. Бу хамыыһыйаҕа Кристина Федорова, Марина Павлова, Валерия Пахомова, Нюргуяна Пономарева киирдилэр.
Амма улууһун үөрэхтээһин салаатын биир идэлээхтэр сойуустарын үлэтэ Саха өрөспүүбүлэтигэр бастыҥнар кэккэлэригэр сылдьар. Биһиги салайааччыбыт Прокопий Семенович ааспыт сыллар түмүктэринэн үтүө суобастаах үлэтин иһин Саха Республикатын Профсоюзтарын Федерациятын Бочуотунай грамотатынан уонна түөскэ анньынар бэлиэнэн наҕараадаламмыта. Ону таһынан кини кулун тутар ыйга үөрэх үлэһиттэрин Саха сиринээҕи идэлээх сойуустарын делегациятыгар киирэн Москуба куоракка ыытыллар биир идэлээхтэр сойуустарын сийиэһигэр кыттыаҕа. Бу Аммаларга, биһиэхэ, үрдүк чиэс буолар.
Быйыл Улуу Кыайыы 80 сылын көрсө бары үөрэх салаатын үлэһиттэрэ үлэнэн күүрэбит. Эйэлээх ыраас халлаан, көхтөөх үлэ олохпутун өрүү сырдата туруохтун!
Ирина Корякина-Олесова