Үлэ Дьоруойа П.И.Яковлев аатынан Амма Наахара орто оскуолатын быйыл бүтэрэн олох киэҥ аартыгар үктэнээри сылдьар барыга талааннаах, иллэҥ кэмигэр уруһуйдуурун олус сөбүлүүр 11-с кылаас үөрэнээччитэ Алина Мартынова үлэлэрин быыстапката турда.
Алина удьуордарын утумнаан кыра сааһыттан уруһуйдуур, уруһуйдьут аҕатын утумнаан кырааска дьүһүнүн сөпкө туттар. Ону тэҥэ компьютернай дизайны баһылаабыта үһүс сыла. Быыстапкаҕа оскуола иһинэн үлэлиир «Аартык» медиакиин корреспондена Яна Егорова уруһуйдьут кыыһы кытта кэпсэттэ. Кэлбит ыалдьыттар Алина быйылгы үлэлэрин астына көрдүлэр. Онтон “Рисуем все” бырайыакка Алина учуутал төрөппүттэрэ Алёна Егоровнаны, Леонид Николаевиһы кытта бииргэ «Дьиэ кэргэн сөбүлүүр дьарыга» түһүмэххэ сайын оттуу сылдьалларын уруһуйдаабыттара, бырайыак бэлиэтин Болугур нэһилиэгиттэн тутууга кыттыыны ылбыттара.
Бу күн өссө нэһилиэккэ биллэриллибит Ийэ уонна оҕо сылын чэрчитинэн «Ийэ оҕотунаан» диэн таҥаска уруһуй күрэҕэ үрдүк таһымҥа ыытылынна. Күрэҕи алын сүһүөх учуутала Мария Пахомова ыытта. Өҥү дьүөрэлээһин, итиэннэ тарбах талаана быһаарар чааһа үүннэ. Күрэххэ 4-с кылаастан Уруйдаана Унарова ийэтинээн Екатерина Николаевналыын, 5-с кылаастан Дима Пахомов ийэтинээн Евдокия Ивановналыын, 6-с кылаастан Дайаана Кононова ийэтинээн Марианна Ивановналыын, 7-с кылаастан Дамир Мартынов ийэтинээн Алёна Егоровналыын уруһуйга холоннулар. Ийэлэр оҕолоругар маҥан футболкаҕа уруһуйдаан харысхал бэлиэтин түһэрдилэр, онтон оҕолор ийэлэригэр кыракый былаакка бэйэлэрэ айан уруһуй оҥордулар.
Дьүүллүүр сүбэҕэ уруһуй, технология учуутала Светлана Алексеева, алын сүһүөх учууталлара Сардаана Александрова, Надежда Никифорова үлэлээтилэр. Түмүккэ 1-с миэстэҕэ Унаровтар, 2-с миэстэҕэ Кононовтар уонна Мартыновтар, 3-с миэстэҕэ Пахомовтар таҕыстылар. Кыттыбыт дьиэ кэргэҥҥэ кылаас төрөппүт кэмитиэтэ бэйэлэрин бэлэхтэрин оҥордулар. Маннык үтүө түмүктэрдээх таһаарыылаах үлэ күнэ олус сэргэхтик, умнуллубаттык ааста.
Ирина КОРЯКИНА-ОЛЕСОВА