Аммаҕа «Хомус алыптаах дорҕооно» диэн улуустааҕы хомусчуттар күөн күрэхтэрэ Хомус декадатын чэрчитинэн бэрт сэргэхтик ыытылынна. Күрэх отут икки хомусчуту биир түһүлгэҕэ түмтэ. Амма Наахараттан Туяра Мартынова салайар «Үрүйэчээн» фольклорнай бөлөҕө күрэххэ кыттан Маҥнайгы үрдэл үрдүк ааты сүгэн кыайыы өрөгөйдөннө.
Бу күн ахсыс кылаас бастыҥ үөрэнээччитэ Алгыстаана Мартынова иккис, оскуоланы быйыл бүтэрээччи, оскуола лидера Сандал Павлов үһүс үрдэллэри ылары ситистилэр. Бөлөх салайааччыта Туяра Захаровна бу күн иккис үрдэл итиэннэ Бастыҥ салайааччы анал аат хаһаайкатынан буолла уонна хомус түмэлин «Хайҕабыл суругунан» наҕараадаланна. Кини үөрэппит, кэрэ эйгэтигэр сыһыарбыт үөрэнээччитэ, билигин «Түмэн» сынньалаҥ киин хореографа Иван Ефремов күрэххэ кыттан «Тэтимнээх тардааччы» анал ааты үөрэ-көтө тутта.
Бу бэлиэ күн хомус түмэлин үлэһиттэрэ «Хомус дорҕооно» диэн Аан дойду хомуһун быыстапкатын тэрийэн бар дьон махталын, сэҥээриитин ыллылар. Бөтүҥ, Сатаҕай нэһилиэгэр олорор хомус уустара атыы-эргиэн тэрийдилэр.
Хомус тыаһа дьүрүһүтэн, тула эйгэни ыраастыы, айылҕа көстүүтүн хоһуйа үйэлэртэн үйэҕэ кэрэни, сырдыгы түстүү, этэ-тыына туруохтун!
Ирина Корякина — Олесова.