Үйэ аҥарыттан ордук кэм олорбут Пахомовтар дьиэ кэргэн

Ыам ыйын 15 күнэ — Дьиэ кэргэн Аан  дойдутааҕы күнэ. Дьиэ кэргэн диэн таптал уйата, киһи оҕолуу уоскуйар биһигэ буолар. Кэргэниилэргэ ил-эйэ эҥэрдэстэҕинэ, дьиэ холумтана сылаас буолар, оҕо-уруу толору биир санаанан салайтарар байылыат олох кэлэр. Амма Наахара олохтоох дьаһалтата бу дьоро күнү көрсө 55-с сылларын “эн-мин” дэһэн олорбут нэһилиэк ытык-мааны ыалын Марфа Матвеевна, Николай Семёнович Пахомовтарга  сылдьан истиҥ эҕэрдэтин тириэртэ.


Юбилярдар, Марфа Матвеевна уонна Николай Семенович нэһилиэк аҕа баһылыгын Захар Александрову, баһылык солбуйааччытын Сахаяна Михайлованы үөрэ-көтө көрүстүлэр, олох-дьаһах туһунан сэһэргэстилэр.

 Амма Наахара нэһилиэгин биир ытык-мааны ыала, эдэр саастарыттан тыа сирин хара үлэтигэр сылайары билбэккэ үлэлээн-хамнаан кэлбит, 3 кэрэчээн кыталык кыргыттарга күн сирин көрдөрбүт,  улаатыннаран киһи киэнэ килбиэнэ, ийэ киэнэ ааттааҕа буолан тахсалларын ситиспит, 55 сыл бииргэ олорор бигэ тирэхтээх, сылаас холумтаннаах Марфа уонна Николай Пахомовтар буолаллар. Марфа Матвеевна эдэр сааһыттан ыанньыксытынан үлэлээн, кэлин осеменатор үөрэҕин ылан идэтинэн үлэлээбит, түргэн туттуулаах, ханнык да үлэттэн толлон турбат туруу  үлэһит буолар. Олоҕун аргыһа Николай Семёнович сэрии сылын оҕото. Кыра эрдэҕиттэн олох бары тургутуутун ааспыта.  Үлэһит бэрдэ буолан тырахтарыыстаабыта, онтон механизатордар биригэдьиирдэрэ буолбута. Кыталык кыргыттара Сардаана олохтоох дьаһалта тутаах үлэһитэ, дьаһалта үлэлиир дьиэтин ырааһын хааччыйар үлэһит бастыҥа буолар. Иккис кыыс Анжелика иитээччи идэлээх, Аммаҕа «Кэнчээри» уһуйааҥҥа иитээччинэн үрдүк таһаарыылаахтык үлэлиир,  СӨ үөрэҕин туйгуна. Кыралара Нина повар- кондитер минньигэс идэтин толору баһылаабыт кыыс потребкооперация туйгуна. Үлэни өрө туппут ыал иккиэ бэйэлэрэ элбээн, хос эбээ-эһээ дэттэрэн, тэҥ санааҕа салайтаран,  Аммаҕа  кыстаан баран, Өнньүөстэригэр,  кэлэн дойдуларын салгынынан толору тыына, ахтылҕаннаах нэһилиэктэрин аймах-билэ дьонун кытта сэһэргэһэ саҥа күннэрин үөрэ-көтө көрсөллөр.

Убаастыыр дьоммутун дьиэ-кэргэн күнүнэн эҕэрдэлээн туран бары үтүөнү баҕарабыт. Санаабыккыт сатаннын, толкуйдаабыккыт туоллун, эдэрдии эрчимҥитин ыһыктыбакка оҕолоргут сылаас иэйиилэригэр куустаран өссө уһуннук олорун!

Ирина КОРЯКИНА-ОЛЕСОВА

Читайте дальше