Саха Өрөспүүбүлүкэтин үтүөлээх үлэһитэ, РСФСР норуотун үөрэҕириитин туйгуна, Российскай Федерация уопсай үөрэхтээһинин Бочуоттаах үлэһитэ, үөрэхтээһин эйгэтигэр 54 сыл үлэлээбит Вера Васильевна Чупрова үөрэх эйгэтигэр үлэлээбитэ 54 сылын, ол иһигэр Амма оройуонугар 45 сыл үлэлээбитин биир идэлээхтэрин ортолоругар бэлиэтээтэ. Үйэ аҥарыттан ордук кэм биир салааҕа түбүгүрүү – эттэххэ эрэ дөбөҥ, бу барыта идэҕэ тапталтан, бэриниилээх буолууттан кэлэр.
Ытыктыыр киһибит Вера Васильевна Амма улууһун үөрэҕириитин эйгэтигэр 45 сыл эӊкилэ суох үлэлээн кэллэ. Маӊнай кини үлэтин Булун улууһун Таймылыыр уһуйааныттан саҕалаабыта, онтон 1979-1980 үөрэх дьылыгар Сулҕаччы уһуйааныгар иитээччинэн үлэлии кэлбитэ. Ол кэннэ 10 сыл Амма улууһун үөрэҕириитин салалтатыгар оскуола иннинээҕи үөрэх салаатыгар методиһынан уонна инспекторынан, 1990–1993 сылларга коррекционнай көмө оскуола-интернакка логопедынан уонна директорынан үлэлээбитэ. Вера Васильевна 1993 сылтан ыла Амма оройуонун үөрэҕириитин салалтатыгар оскуола иннинээҕи үөрэх салаатын салайан кэллэ.
Бу бэлиэ тэрээһиҥҥэ Амма улууһун үөрэҕириитин салалтатын начальнигын солбуйааччы Татьяна Иванова, Амма педагогтарын идэлээх сойуустарын улуустааҕы кэмитиэтин бэрэссэдээтэлэ Прокопий Бытыров, бииргэ үлэлээбит коллегалара, Амма улууһун бары уһуйааннарын сэбиэдиссэйдэрэ, методистара, үөрэх эйгэтин ытык-мааны ветераннара Вера Васильевнаны бочуоттаах сынньалаӊӊа атааран, эҕэрдэ маанытын эттилэр, алгыс үтүөтүн анаатылар. Хас биирдии тыл этээччи Вера Васильевна үлэтигэр олус бэриниилээҕин, кыһамньылааҕын бэлиэтээтилэр.
Минньигэс астаах, итии чэйдээх остуол тула олорон ыалдьыттар өр сыллар тухары бииргэ олус үчүгэйдик үлэлээбиттэрин санаан-ахтан аастылар. Киһини долгутар, уйадытар элбэх истиҥ кэпсэтии таҕыста, өйдөбүнньүк бэлэх туттарыллынна. Бу күн Вера Васильевнаҕа «Амма улууһун үөрэҕин эйгэтигэр кылаатын иһин» уонна «Амма улууһун үөрэҕин эйгэтин Бочуоттаах наставнига» диэн түөскэ анньылар бэлиэлэри туттардылар.Истиҥ көрсүһүүнү «Радуга» уһуйаан ансаамбыла, «Сардаана» уһуйаан үлэһиттэрэ уонна Анна Матвеева тэрээһини кэрэ матыыптаах ырыанан, үӊкүүнэн киэргэттилэр.
Анна Семенова, Амма улууһун үөрэҕириитин салалтатын сүрүннүүр исписэлииһэ.