Амма улууһун бары нэһилиэктэригэр аҕам саастаахтар күннэригэр анаммыт декада ыытыллан түмүктэнэр. Хас биирдии нэһилиэк араас тэрээһиннэри толкуйдаан ыытан бэрт сэргэх тэрээһиннэр ыытылыннылар. Абаҕа нэһилиэгэр эмиэ декада ыытыллан, түмүктүүр тэрээһин буолла. Бу күн быыстапка, сэдэх хаартыскалары көрүү, ону сэргэ улуустааҕы “Амма олоҕо” хаһыакка сурутуу тэрилиннэ.
Үстүүн Нохсоороп аатынан култуура киинигэр аҕам саастаахтар декадаларын түмүктүүр тэрээһин киэһэтэ “Түһүлгэ” эбэлэр түмсүүлэрин эҕэрдэ үҥкүүлэринэн аһылынна. Манна даҕатан эттэххэ, түмсүү бу сыл сэтинньитигэр тэриллибитэ 10 сылын үөрүүлээхтик бэлиэтээри айымньылаах киэһэтин бэлэмнии сылдьар. Мустубут дьону нэһилиэк баһылыга Максим Семенов, нэһилиэк бэтэрээннэрин Сэбиэтин бэрэссэдээтэлэ Маргарита Смитина эҕэрдэлээтилэр. Ону сэргэ Амма Преображенскай таҥаратын дьиэтэ тутуллубута 200 сылыгар анаммыт быыстапканы билиһиннэрэн, Амма приходун чилиэнэ Вероника Тимофеева, Күннүк Уурастыырап аатынан кииннэммит бибилэтиэкэ дириэктэрэ Прокопий Прокопьев уонна “Амма олоҕо” хаһыат эрэдээктэрэ Наталья Бубякина эҕэрдэ тылларын тириэрдэн туран хаһыакка сурутуу туһунан кэпсээтилэр.
“Биһиги улууспут хаһыатыгар олохпут тухары сурутабыт. Хаһыата суох иэдэйэбит буоллаҕа. “Амма олоҕун” ааҕабыт бөҕө. Быйыл да кэлэр сылга сурутан олоробут. Ону кытта хайаатар да “Кыым” уонна “Саха сирэ” хаһыаттарга эмиэ сурутабыт”, — диэн этэллэр 85 саастаах, педагогическай үлэ бэтэрээнэ Софья Петровна уонна 91-с хаарын түһэрбит, бэйэтин кэмигэр Үрдүкү Сэбиэт дьокутаата буолан үгүс үлэни ыыппыт Валерий Степанович Скрябиннар.
Аҕам саастаахтар минньигэс астаах остуол тула олорон астына сэһэргэстилэр, култуура үлэһиттэрэ бэлэмнээбит ылбаҕай ырыаларын иһиттилэр, сэдэх хаартыскалары көрөн сэргээтилэр.
“Биһиги нэһилиэк олус баай историялаах. Оскуолабыт иһинэн үчүгэй баҕайы түмэллээхпит дьиэ-уота табыллыбакка үлэлээбэккэ турбута, ол сэргэхситтиллэн, оҥоһуллан киэҥ эйгэҕэ тахсыа. Нэһилиэк бэйэтэ түмэллээх буоларыгар баҕарабыт. Бу киэһэҕэ Полина Дмитриевна Емельянова диэн аҕам саастаах бэтэрээммит туох да сэдэх хаартыскаларын көрдөрүүгэ ыыппытын сэргии көрдүбүт. Сэдэх хаартыскалары сэргэ нэһилиэк олохтоохторо илдьэ сылдьар сэдэх малларын аҕалан эмиэ көрдөрдүлэр. Ол курдук Софья Петровна Скрябина, Валентина Иванова Карманова олус интэриэһинэй историялаах маллары аҕалан дьон сэҥээриитин ыллылар. Биһиги кырдаҕастарбыт сүрдээх көхтөөхтөр. Туох баар ыытыллар аахсыйаларга, тэрээһиннэргэ туора турбаттар”, — диэн Маргарита Егоровна билиһиннэрдэ.
Бу күн хаһыакка сурутуу, Амма Преображенскай таҥаратын дьиэтин 200 сылыгар анаммыт быыстапканы кытта билсии көхтөөхтүк барда. “Көмүс саас, көмүс күһүн” диэн ретро муода көрүүтүгэр Петрова Марина Михайловна 60 –с сыллар бүтүүлэригэр кэтиллибит муоданы көрдөрөн үөртэ. Бу киэһэ олус көрдөөх, көхтөөх оонньуу күрэхтэр ыытылыннылар, үҥкүү да үҥкүүлэннэ, бириис да туттуллар, онон аҕам саастаахтар ардахтаах күн диэбэккэ кэлэн көхтөөх кыттыыны ылан, астынан тарҕастылар.
“Амма олоҕо” хаһыат