Ырыа күнүгэр Болугур нэһилиэгэр «Тыыннаах доҕуһуол дорҕооно» ньиргийдэ

ТАБЫС — Талааннары арыйар бастыҥ ыччаты сайыннарыахха түмсүү салайааччы Юрий Орестов көҕүлээһининэн, тыыннаах дорҕоон салҕыы сайыннарар сыаллаах тэрээһин Болугурга үрдүк таһымҥа ааста.

Нэһилиэкпитигэр урукку кэмнэртэн ырыа, тыыннаах доҕуһуол аргыстаах бөлөхтөр ыллыы — туойа сылдьыбыттара, талааннаах ыччаттар билигин да бааллар. Ыҥырыыбытын ылынан Абаҕа нэһилиэгин аҕа баһылыга Семенов Максим Владимирович олоҕун аргыһынаан Алена Васильевналыын абаҕатааҕы «Дүкээбил» ВИА бөлөҕүн (салайааччы Захаров Роберт  Владимирович) арыаллаан, Юрий Орестов салайааччылаах Чакыр нэһилиэгин ТАБЫС бөлөх оҕолоро сарсыардаттан саҕалаан тыыннаах доҕуһуолга маастар кылаас ыытан, Болугур нэһилиэгин 6, 7 кылаас оҕолорун «Дьулуур» ансаамбыллара элбэх билиини, сатабылы ыллылар.

Талааннары арыйар бастыҥ ыччаты сайыннарар сыаллаах тэрээһин улууспутугар иккис төгүлүн ыытылынна диэн бэлиэтиибит. Ыалдьыттарбыт кэлээттэрин кытта чэйдэтэн, сынньалаҥ пааркаҕа Ытык маспытыгар илдьэн алаадьылатан, олоҥхо тыыннаах ураһаҕа, «Тускул» оскуола музейыгар сырытыннаран, санаа атастаһыыта төгүрүк остуол ыытылынна.

«Тыынаах доҕуһуол дорҕооно» төгүрүк остуолга Болугурга 70-80 сылларга «Кэскил» ВИА кыттыылаахтара Ефремов Василий Васильевич, Макаров Петр Иосифович кыттыылаах элбэх сүбэлээх олус интириэһинэй кэпсэтии таҕыста. Инникитин кэскиллээх эдэр ыччаттарбытын, оскуола оҕолорун хабан салҕыы үлэни, куруһуоктары тэрийии этиилэрэ киирэн олус астынныбыт.

Эбиэт кэннэ маастар кылааска элбэх баҕалаах оҕолор сылдьан, үөрэнэн, үлэбитин түмүктээн, тыыннаах доҕуһуолунан эҕэрдэ кэнсиэр таҕыста. Кэнсиэргэ тыыннаах доҕуһуолунан элбэх кэрэ ырыалар ылланан дьон — сэргэ олус диэн астыннылар. Маастар кылааска Болугур оҕолорун ансаамбыла ырыа таһаарбыттара үөрдэр, үлэ түмүгэ буолар. Ыалдьыттарбытын күндүлээн, махтанан нэһилиэкпит норуот маастардарын — Устинов Степан Прокопьевич, Михайлова Ульяна Майродовна — Маай кыыһа бэлэхтэрин туттардыбыт. Инникитин саҥа сүүрээннэр, тыыннаах доҕуһуол дорҕооно тыаһыы, ыллыы турдун. Кыттыылаахтарбытыгар барҕа махтал, үтүө санаа куруук аргыстаһа сырыттын.

Евдокия Платонова.

Читайте дальше