“Үрүйэлэр” хаардыы хаамтылар

Сааскы өрөбүл күннэри болугурдар көхтөөхтүк, спорт, чөл олох тула түмсэн атаараллар. Соторутааҕыта түөлбэлэринэн волейболга күрэхтэһии нэһилиэк олохтоохторун сомоҕолоото.

Субуота күн дьахталларга волейболга бастыҥ түөлбэни быһаарар иһин күрэхтэһиигэ 6 хамаанда күөн көрүстүлэр. Эрийсиилээх киирсиилэр түмүктэринэн “Кэскил” бочуоттаах 3-с, “Кустук” 2-с миэстэ буоллулар уонна икки партияны кыайан “Үрүйэ” түөлбэ спортсменнара хотон таҕыстылар.

Өрөбүл күн эр дьоҥҥо эмиэ 6 хамаанда киирсибититтэн “Кустук” 3 миэстэ, 2 миэстэ “Сайдыы”, “Үрүйэ” кыайыылаах таҕыстылар. Онон икки күннээх сыралаах күрэхтэһии түмүгүнэн “Үрүйэлэр” нэһилиэк баһылыгын кубогын иккис төгүлүн ыланнар үөрүүбүт үрдээтэ.

Кыайыыга дьулуурбутунан, түөлбэ көхтөөх көмөтүнэн, түөлбэ салайааччыта Сайыына Афанасьевна Павлова кырата суох сыратынан икки күнү быһа чемпионнаан үрдүк кыайыыны ситистибит.

Манна даҕатан эттэххэ, болугурдар төгүрүк мээчик тула бэркэ күрэхтэһээччибит. СахаВА бэтэрээннэригэр дьахталларга бастакы чемпион да буолбуппут ону туоһулуур. Инникитин даҕаны Болугур оскуолатын оҕолоро, ыччаттара ситиһиилээхтик дьарыктаныахтара, күрэхтэһиэхтэрэ диэн эрэнэбит.

Елена Никифорова, Ло-Хан-Чжоу.

Читайте дальше