Үтүө санаа кэрэһитэ

Сыллата ахсын оскуолаттан кынат анньынан, үөрэх-билии бастакы тирэхтэрин иҥэринэн, майгы-сигили өттүнэн ситэн-хотон, үгүс кэнчээри ыччаппыт олох киэҥ аартыгар үктэнэр. Амма улууһун маҥнайгы кулубата А.П. Рязанскай аатынан Соморсун орто оскуолатын быйыл түөрт оҕо бүтэрэн, ситии-хотуу аттестатын туттулар.


Оскуоланы бүтэрэр оҕолорго үгэс буолбут бастыҥтан бастыҥ лауреаттар ааттара иҥэрилиннэ.

Оскуоланы 2012 сыллаахха «Кыһыл көмүс» мэтээлинэн бүтэрбит Айтал Заборовскай тохсус кылаас үөрэнээччитигэр Ангелина Кононоваҕа «Бастыҥ үөрэнээччи» бириэмийэни туттарда. Педагогическай наука доктора, профессор Михаил Фомин аатынан бириэмийэ 11 кылаас үөрэнээччитигэр Вика Павловаҕа ананна. Бириэмийэни Михаил Матвеевич аймаҕа Гаврил Старостин туттарда. Афанасий Рязанскай аатынан «Бастыҥ общественник» бириэмийэни Сайаана Охлопкова (11 кылаас) тутта. Бириэмийэни Афанасий Петрович аймахтара туттардылар. Людмила Петровна, Семен Семенович Рязанскайдар ааттарынан «Бастыҥ спортсмен» бириэмийэ 10 кылаас үөрэнээччитигэр Эрчим Васильевка туттарылынна, бириэмийэни кинилэр оҕолоро Ирина Колодезникова, Вячелсав Рязанскай туттардылар. Норуодунай суруйааччы Василий Васильев-Харысхал аатынан стипендияны Сайаана Охлопкова, Айаана Мартынова ылан үөрүүлэрэ үксээтэ. Баһылай Харысхал аймахтара туруорбут бириэмийэлэрин бииргэ төрөөбүт балта Александра Терентьева туттарда.

Быйылгы үөрэх дьылын түмүктүүр тэрээһин биир бэлиэ түгэнинэн Юрий Попов салайааччылаах «Таас тумус» түмсүү оскуоланы бүтэрэр үөрэнээччилэргэ харчынан бириэмийэ бэлэх оҥорон соһуччу үөрүүнү бэлэхтээтэ.

Оскуолабыт меценаттара Августа Парфенова, Вера Старостина бэйэлэрин анал стипендияларын Ньургун Степановка анаатылар.

Соморсун оскуолатын выпускнига, үөрэх туйгуна  Василий Скрыбыкин аатынан стипендияны Михаил Жирков уонна Евдокия Бурнашева дьиэ кэргэттэрэ Сайаана Охлопковаҕа анаатылар.

Выпускниктар, төрөппүттэр, оскуола коллектива оҕолор олох киэҥ суолугар үктэнэр эппиэттинэстээх кэмнэригэр сыллата көмө-тирэх буолар дьонноругар барҕа махтал тылларын анаатылар, уйгулаах олоҕу, кытаанах доруобуйаны, ситиһиилээх үлэни баҕардылар.

 

Надежда ОХЛОПКОВА, дириэктэри иитэр үлэҕэ солбуйааччы, сүбэһит.

Читайте дальше