Бэҕэһээ Дьокуускай куоракка «Үүнээйис» лааҕыр төрүттэммитэ 30 сылынан «30 лет летней саха-немецкой школе «Үүнээйис» кинигэ тахсыбытын сүрэхтиир үөрүүлээх тэрээһин Хотугулуу-Илиҥҥи федеральнай университет библиотекатын научнай саалатыгар буолан ааста. Араас сылларга үлэлээбит, үөрэммит дьон-сэргэ толору саала муһуннулар. Кинигэни ааптар Федор Мартынов хомуйан оҥордо.
Республиканы, оройуону, үөрэҕириини, немецкэй тыл үөрэтиитин үрдүк таһымҥа таһаарбыт сайыҥҥы немецкэй тыл лааҕырын үлэтэ, олоҕо иһирэхтик ахтылынна, инники сайдыытын тула кэпсэтии барда. Лааҕыры төрүттээччи Василий Федоров аата элбэхтик үтүө тылынан ахтылынна. Методист Ольга Кычкина национальнай-региональнай концепция сайдыытыгар сөп түбэһиннэрэн хорутуулаахтык, киэҥ далааһыннаахтык үлэлээбиппит диэн аҕынна. Биллэрин курдук, «Үүнээйис» норуоттар икки ардыларынааҕы дэнэр бастакы сылларыгар лааҕыр Амма бастакы нүөмэрдээх оскуола базатыгар киирсэрэ. Биһиги оскуолабытыттан учууталлар Наталья Колодезникова, Мария Кузьмина, Лариса Егорова, Антонина Поскачина, Вера Бессонова, Мотрена Федорова, Бөтүҥ оскуолатыттан учуутал Ольга Егорова, Болугур оскуолатыттан учууталлар Мария Устинова, Зинаида Александрова, Александра Александрова, Амма гимназиятыттан Оксана Тихонова сайыҥҥы уоппуска кэмэ диэбэккэ, уонунан сыллар тухары улахан эппиэтинэстээх үлэҕэ, лааҕыры сууйан-тараан бэлэмнээһинтэн саҕалаан омук дьонугар дойдубут историятын, культуратын билиһиннэрэн, дьиэҕэ-уокка ыалдьыттатан, тэҥҥэ үлэлээн, алтыһан умнуллубат сыллары аһарбыппыт, сайдыбыппыт, саҥа кэми кытта тэҥҥэ хардыылаабыппыт.
Кинигэ тахсыытыгар да, сүрэхтэниитин тэрээһинигэр да улахан көмөнү бэйэбит ыччаттарбыт — Амма уолаттара Владлен Кугунуров (омук тылын институтун директора), Евгений Парфенов (институт гуманитарнай идэлэргэ кафедратын сэбиэдиссэйэ) оҥордулар. Кинигэ 250 тираһынан таҕыста. Кинигэ Учууталлар таһымнарын үрдэтэр институт, Амма оройуонун үөрэҕин салалталарын өйөбүллэринэн, үп-харчы көрүүтүгэр Амма улууһун баһылыгын бастакы солбуйааччы Василий Бураев, социальнай боппуруостарга солбуйааччы Нюргуяна Илларионова, Амма нэһилиэгин баһылыга Михаил Артемьев, Амматааҕы киин библиотека директорын солбуйааччы Светлана Макарова, үөрэх салалтатын начальнига Николай Ларионов, солбуйааччы Татьяна Иванова, биирдиилээн дьон, урбаанньыттар Лариса Николаева, Евгений Тобонов, Евгений Николаев, Дина Бахсырова уонна кинигэ ааптара Федор Мартынов элбэх дьону-сэргэни түмпүтүн, элбэх ахтыы хомулларын ситиспитин түмүгэр кинигэ күн сирин көрдө. Кинигэ сүрэхтэниитин Алтана Артемьева сатабыллаахтык иилээн-саҕалаан ыытта.
Эҕэрдэ лааҕыр үлэтигэр, сайдыытыгар тус кылааттарын киллэрбит үлэһит дьоҥҥо, махтал бастыҥа ветеран учууталга Федор Мартыновка.
- Вера БЕССОНОВА,
- «Үүнээйис» лааҕыр 1998-2001 сылларга преподавателэ.