Эмис нэһилиэгэр баһылык Прокопий Бубякин 2024 сылга ыытыллыбыт үлэ отчуотун нэһилиэнньэҕэ туруорда. Олохтоохтор ыытыллыбыт үлэни биһирииллэрин биллэрдилэр.
Отчуот бары хайысхаларынан, ол курдук суол, тутуу, тупсаран оҥоруу, социальнай эйгэ, култуура эйгэтин хабан барда. Санааларын эппиттэр дьаһалта билиҥҥи уустук кэмҥэ, үп-харчы татым кэмигэр сөптөөх хайысханан иннин диэки баран иһэр диэн сыаналатылар уонна үлэни биһирээтилэр. Бэйэлэрин боппуруостарыгар киирээри турар уларыйыылар, оскуола-саад тутуутугар, тутуута тохтоон турар 5 кыбартыыралаах дьиэ хаһан олоххо киириэҕэр уонна да атын боппуруостары биэрэн эппиэттэри ыллылар. Прокопий Петрович иһитиннэрбитинэн өссө икки отчуот күүтэр. Ол курдук тохсунньуга улуус баһылыгын уонна олунньуга өрөспүүбүүкэ бырабыыталыстыбатын отчуоттара буолуохтара.
Эрчим НИКОЛАЕВ